Թուրքիայի խորհրդարանը ապրիլի 1-ին վավերացրել է սեւծովյան Սինոփ նահանգում Ճապոնիայի հետ ԱԷԿ կառուցելու մասին համաձայնագիրը։
Սինոփում Թուրքիայի երկրորդ ԱԷԿ-ի կառուցման մասին համաձայնագիրը ստորագրվել էր 2013թ. հոկտեմբերին Թուրքիայի եւ Ճապոնիայի վարչապետներ Ռեջեփ Թայիփ Էրդողանի եւ Սինձո Աբեի կողմից։ Նախագիծը պլանավորվում է ավարտին հասցնել 2023թ.։ Նախագծի ընդհանուր արժեքը կազմելու է 22 մլրդ դոլար։ Կայանը կմշակի մոտավորապես 40 մլրդ կՎտ/ժ էլեկտրաէներգիա, գրում է «ՌԻԱ Նովոստի»-ն։
Համաձայնագիրը վավերացվել է՝ չնայած ընդդիմադիր Ազգային հանրապետական կուսակցության պատգամավորների առարկություններին, որոնք հիմնված էին այն հանգամանքի վրա, որ կայանը կառուցվելու է սեյսմիկ անկայուն վայրում։