«ՄԷԿ ԿԱԴՐ» կարճ ֆիլմերի միջազգային 13-րդ փառատոնի բաց հայտագրումն արդեն սկսված է. այն կտեւի մինչեւ ապրիլի 21-ը:
Նշենք, որ այս միջազգային փառատոնը հիմնադրվել է 2003թ.-ին «Նորարար փորձառական արվեստի կենտրոնի» («ՆՓԱԿ») գեղարվեստական ղեկավար, կինոռեժիսոր Գագիկ Ղազարէի կողմից: Փառատոնն ամենամյա է:
*ՄԷԿ ԿԱԴՐ* 13-րդ փառատոնի բաց հայտագրումն արդեն սկսված է: Կանոնակարգին եւ մասնակցության մանրամասներին հայտատուները կարող են ծանոթանալ http://accea.info/hy/one-shot կայքում:
«ՆՓԱԿ»-ը ապահովում է փառատոնի կազմակերպման ամբողջ տեխնիկան, ֆինանսավորման զգալի մասը: Փառատոնը բաց է հանրության համար, մասնակցությունն անվճար է, տոմսեր չեն վաճառվում:
Հիմնադրման օրվանից մինչ օրս «ՄԷԿ ԿԱԴՐ» փառատոնը աջակցում է աուդիո վիզուալ դաշտում ստեղծագործող անհատներին ու կազմակերպություններին: Փառատոնը մրցութային է, որտեղ կարել է տեսնել աշխատանքներ ամբողջ աշխարհից, սկսած մեկ րոպեից մինչեւ լիամետրաժ դոկումենտալ եւ խաղարկային ֆիլմեր: Փառատոնը ունի 3 մրցութային անվանակարգեր. «ՄԷԿ ԿԱԴՐ ՄԷԿ ՐՈՊԵ», «ԿԱՐՃԱՄԵՏՐԱԺ ՖԻԼՄԵՐ» եւ «ԿԻՆՈ ԱՌԱՆՑ ՍԱՀՄԱՆԻ»: Հրավիրվում է պրոֆեսիոնալ ժյուրի, որոնց հետ մասնակիցները ունենում են քննարկումներ, տեղի են ունենում վարպետության դասեր եւ հատուկ ցուցադրություններ: Փառատոնը համագործակցում է Հայաստանում եւ արտերկրում աուդիո վիզուալ դաշտում գործող տարբեր կազմակերպությունների եւ փառատոնների հետ:
«ՄԷԿ ԿԱԴՐԸ» տարիներ շարունակ նպաստում է երիտասարդական ու անկախ կինոյի զարգացմանը Հայաստանում: Դրա ապացույցը 12 տարիների հետեւողական աշխատանքն է: 2000 - ի հասնող այցելությունները, պրոֆեսիոնալների ու մասնակիցների բարձր գնահատականը, ինչպես նաեւ բազմաթիվ կամավորների ոգեւորությունը մեր փառատոնի կարեւոր ձեռքբերումն է:
Ուրախ կլինենք Ձեր աջակցությամբ էլ ավելի ընդլայնել փառատոնի մասնակցության շրջանակները եւ օգտակար լինել բազմաթիվ երիտասարդների: Դա հնարավորություն կընձեռնի նրանց հանդիպել մասնագետների, դիտել լավ ֆիլմեր, իսկ լավագույններին արժանանալ մրցանակների, որը համոզված ենք կխթանի նրանց ստեղծագործական ուղուն: