ԱՄՆ Վերմոնտի նահանգի Օրենսդիր ժողովի երկու պալատները Հայոց ցեղասպանության 100-ամյակի կապակցությամբ միաձայն համատեղ բանաձեւ են ընդունել եւ մարդկության դեմ գործած այս հանցագործության զոհերի հիշատակին նվիրված մի շարք միջոցառումներ են կազմակերպել։ Այս մասին NEWS.am-ը տեղեկացավ ԱՄՆ Հայ դատի հանձնախմբի արեւելյան շրջանի մասնաճյուղից։
Բանաձեւի նախագիծը նախաձեռնել էին Վերմոնտի նահանգի Ներկայացուցիչների պալատի անդամներ Ջոան Լինսը, որը Ցեղասպանություն վերապրած ասորիների ժառանգ է, եւ Ադամ Գրեշինը։ Նահանգի Սենատում բանաձեւի առաջատար կողմնակիցներից են եղել Դիք Սիրսը, Ֆիլիպ Բարութը եւ Դիանա Սնելլինգը, իսկ 30 սենատորներից 14-ը եղել են նախագծի համահեղինակները։
«Սա հիանալի օր էր։ Մարդիկ կիսում են ընդհանուր անցյալը՝ չմոռանալով նրա մասին եւ ավելի շատ բան իմանալով՝ առաջ են նայում, հնարավորություն ստանալով դառնալ ավելի լավը»,- նշել է Վերմոնտի նահանգի Ներկայացուցիչների պալատի անդամ Ջոան Լինսը բանաձեւն ընդունելուց հետո։ Այնուհետեւ նա ներկայացրել է հայկական համայնքի անդամներին եւ բոլորին հրավիրել է Հայոց ցեղասպանության թեմայով ցուցադրությանը, որին մասնակցել են Քրիս Բոխջալյանն ու Դանա Ուոլրաթը։