Կիպրոսի Հանրապետության խորհրդարանն, այսօր՝ ապրիլի 2-ին, միաձայն ընդունեց Հայոց ցեղասպանության ժխտումը քրեականացնող օրինագիծը: Այս մասին NEWS.am-ին ասաց Կիպրոսի խորհրդարանի պատգամավոր Վարդգես Մահտեսյանը:
Նշենք, որ օրինագծի քննարկումը մարտի 26-ին հետաձգվել էր, քանի որ կիպրոսցի պատգամավորները վերապահություններ են ունեցել հարցի վերաբերյալ, նրանց մի մասն էլ ցանկացել էր, որ միայն Հայոց ցեղասպանության ժխտման քրեականացմանն ուղղված օրինագիծ ընդունվի:
Հիշեցնենք, որ Կիպրոսի խորհրդարանում օրինագիծը ներկայացրել են բոլոր քաղաքական կուսակցությունները համատեղ: Այն պատիժներ է նախատեսում ցեղասպանությունը, պատերազմական հանցագործությունները եւ մարդկության դեմ կատարված հանցագործությունները չճանաչողների համար: Նշվում է, որ օրինագիծն առաջարկվում է ընդունել Հայոց ցեղասպանության 100-ամյա տարելիցի կապակցությամբ:
Կիպրոսի Հանրապետությունը ճանաչել է Հայոց ցեղասպանությունը:
Նշենք, որ այս պահին Կիպրոսում է գտնվում ՀՀ Ազգային ժողովի նախագահ Գալուստ Սահակյանի գլխավորած պատվիրակությունը:
