Հայաստանում հեռուստաեթերի թվայնացման աշխատանքների 60-70%-ն իրականացվել է: Այս մասին ապրիլի 2-ին Կառավարության նիստից հետո լրագրողների հետ զրույցում հայտարարեց տրանսպորտի եւ կապի նախարար Գագիկ Բեգլարյանը:
Նրա խոսքով, ներկայում քննարկվում է թվային հեռարձակման ներդրման հետաձգման ժամկետի հարցը, որը նախկինում սահմանված էր մինչեւ 2015 թվականի հուլիսը:
«Վարչապետի հետ զրույցում ես նշեցի, որ առայժմ դժվար է կոնկրետ ժամկետներ նշել: Դրա համար հարկավոր է մի շարք ուսումնասիրություններ ավարտին հասցնել, ինչից հետո միայն կկարողանանք ասել, դա տեղի կունենա մեկ, մեկուկես, թե երկու տարի անց»,- պարզաբանեց Բեգլարյանը:
Հիշեցնենք, որ Հեռահաղորդակցության միջազգային միությանն (ITU) անդամակցության արդյունքում Հայաստանը «Հեռուստատեսության եւ ռադիոյի մասին» օրենքում պարտավորեցրել է 2015 թվականից անցնել թվային հեռարձակման: