Ամերիկյան Քալիֆորնիայի նահանգի օրենսդիր մարմնում հայկական խումբը, որի անդամ են Ադրին Նազարյանը, Քաչո Աչաջյանը եւ Սքոթ Ուիլքը, Հայոց ցեղասպանության 100-րդ տարելիցին նվիրված նախաձեռնություններով է զբաղված։
Խումբը բանաձեւի նախագիծ է ներկայացրել, ըստ որի 2015-ը Քալիֆորնիայում հայտարարվում է Հայոց ցեղասպանության տարելիցի տարի։
Ի նշան համերաշխության Քալիֆորնիայի օրենսդիր մարմնի շատ անդամներ միացել են բանաձեւ նախագծին, ինչն աննախադեպ աջակցության դրսեւորում է։
«Կոնգրեսն ու նախագահ Օբաման պետք է պաշտոնապես ճանաչեն Հայոց ցեղասպանությունը, ինչպես նաեւ մասնակցեն Թուրքիայի հետ երկխոսությանը, որպեսզի վերջինս մեկընդմիշտ հաշտվի իր անցյալի հետ»,-հայտարարել է Ադրին Նազարյանը։
Բացի այս բանաձեւի նախագծից, հայկական խումբը մի շարք միջոցառումներ կիրականացնի։ Նահանգի Սակրամենտո քաղաքում ապրիլի 20-ին Հայոց ցեղասպանության զոհերի հիշատակին նվիրված միջոցառում տեղի կունենա։ Քալիֆորնիայի նահանգի թանգարանում մարտի 31-ին բացվել է «Հայկական ճանապարհորդություն. Կոտրված անցյալից դեպի ծաղկում» անվանումը կրող ցուցահանդեսը, որը կտեւի մինչեւ օգոստոսի 2-ը։
