Իրանի վրայից պատժամիջոցները հանելուց հետո Հայաստանի եի Իրանի միջեւ իրականացվող առաջին ծրագիրը կլինի Մեղրու ՀԷԿ-ը։ Այս մասին ապրիլի 11-ին մամուլի ասուլիսի ժամանակ հայտարարեց իրանագետ Գոհար Իսկանդարյանը։
Ըստ իրանագետի, Իրան Հայաստան երկաթուղին, ավելի շատ Հայաստանին է պետք, քան Իրանին։ «Իրանին այդ նախագիծն ավելի շատ քաղաքական նպատակներով է անհրաժեշտ»,- հայտարարեց իրանագետը։ Իսկանդարյանը հիշեցրեց, որ Հայաստանը պետք է կառուցի այդ երկաթուղու 200 կմ-ը, իսկ Իրանը՝ ընդամենը 60 –ը։ «Իմ խորին համոզմամբ՝ Հայաստանի ղեկավարությունը բավական քաղաքական կամք ունի Իրանի հետ համագործակցությունը ընդլայնելու համար։ Այստեղ հարցը ֆինանսական խնդիրներն են, սակայն ես հույս ունեմ, որ այդ հարցերը կլուծվեն»,- եզրափակել է Գոհար Իսկանդարյանը։
Հիշեցնենք, որ «վեցնյակն» ու Իրանը ապրիլի 2-ին համաձայնության են եկել այն մասին, որ Իրանը պետք է սահմանափակի ուրանի հարստացման իր հնարավորությունների 2/3-ը առաջիկա 10 տարիների ընթացքում։ Բացի այդ, Իրանը պարտավորվում է ուրանի հարստացման իր ծրագրերը 25 տարի ժամկետով դնել միջազգային հսկողության տակ։
Պայմանագրի նախապատրաստման գործընթացը պետք է ավարտվի մինչև հունիսի 30-ը:
