Ապրիլի 11-ին մայրաքաղաքում հայտարարված համաքաղաքային ծառատունկի շրջանակում Երեւանի քաղաքապետ Տարոն Մարգարյանը ՀՀ-ում հավատարմագրված դիվանագիտական կորպուսի ներկայացուցիչների հետ միասին ծառեր է տնկել Ծիծեռնակաբերդի հուշահամալիրի հարակից անտառային գոտում: Հարկ է նկատել, որ հուշահամալիրի հարակից տարածքը քաղաքապետարանի կողմից նաեւ ամբողջությամբ բարեկարգվել է: Պատասխանելով լրագրողների հարցերին` Տարոն Մարգարյանը շնորհակալություն է հայտնել դիվանագիտական կորպուսի ներկայացուցիչներին` համաքաղաքային ծառատունկին ակտիվ մասնակցության համար:
«Արդեն բարի ավանդույթ է դարձել Հայաստանում հավատարմագրված դեսպանների մասնակցությունը համաքաղաքային ծառատունկերին եւ, օգտվելով առիթից, իմ շնորհակալությունն եմ հայտնում բոլորին՝ հերթական անգամ մեր կոչին արձագանքելու եւ մեր կողքին լինելու համար: Ցեղասպանության 100-ամյա տարելիցին ընդառաջ` այս անգամ դեսպանների հետ ծառատունկը մենք իրականացրեցինք Ծիծեռնակաբերդի հարակից լանջի հատվածում», - նշել է Տարոն Մարգարյանը:
ՀՀ-ում հավատարմագրված դեսպաններն էլ իրենց հերթին, ողջունելով նախաձեռնությունը, նշել են, որ այն անչափ կարեւոր է ոչ միայն շրջակա միջավայրի պահպանության տեսանկյունից, այլեւ ինքնատիպ քայլ է ժողովուրդների բարեկամության ամրապնդման առումով: Նրանք առանձնակի կարեւորել են նաեւ ծառատունկի համար ընտրված վայրը՝ նշելով, որ տնկված յուրաքանչյուր ծառով նրանք յուրովի զորակցություն են հայտնում հայ ժողովրդին:
Ծիծեռնակաբերդի հուշահամալիրի հարակից անտառային գոտում կազմակերպված ծառատունկի շրջանակում տարածքը համալրվեց շուրջ 500 տնկիներով:
