Վստահությամբ կարելի է ասել, որ 2016 թվականին Հայաստանը կընդունի Հռոմի Ֆրանցիսկոս Պապին: Այս մասին հայտարարել է ՀՀ նախագահ Սերժ Սարգսյանը՝ իտալական խոշորագույն Rai հեռուստառադիոընկերությանը տված հարցազրույցում՝ պատասխանելով ԱՊՀ հարցերով հայտնի մեկնաբար Մարկ Իննարոյի հարցին:
«Ես վստահ եմ, որ հաջորդ տարի մենք կընդունենք Ֆրանցիսկոս Պապին: Երբ ես վերջին անգամ հանդիպեցի նրա հետ, նա ասաց. «Ես սրտիս կանչով կկատարեմ այց այցը»,-հայտարարել է ՀՀ նախագահը:
Հիշեցնենք, որ ներկայումս Սերժ Սարգսյանը պաշտոնական այցով գտնվում է Իտալիայում: Այսօր նա Իտալիայի Նեապոլ քաղաքի Սուրբ Գրիգոր Լուսավորիչ եկեղեցում ներկա է գտնվել Գարեգին Բ Ծայրագույն Պատրիարք եւ Ամենայն Հայոց Կաթողիկոսի եւ կարդինալ Սեպեի կողմից մատուցված եկեղեցական արարողությանն ու Հայոց ցեղասպանությանը նվիրված հուշակոթողի՝ Ջուղայի խաչքարերից մեկի կրկնօրինակ խաչքարի բացման եւ օծման արարողությանը:
Ապրիլի 12-ին Հռոմի Պապը պատարագ կմատուցի Հայոց ցեղասպանության զոհերի հիշատակին, որն ուղիղ կհեռարձակվի:
