Այսօր Ազատ դեմոկրատներ կուսակցության գրասենյակում տեղի ունեցավ ՀՀ-ում ԱՄՆ դեսպան Ռիչարդ Միլսի հանդիպումը Ազատ դեմոկրատներ կուսակցության նախագահ Խաչատուր Քոքոբելյանի հետ: Հանդիպմանը մասնակցում էին ԱՄՆ դեսպանատան Քաղաքական եւ տնտեսական բաժնի ղեկավարի տեղակալ Ռուբեն Հարությունյանը, Ազատ դեմոկրատներ կուսակցության վարչության անդամ Արմեն Առաքելյանը, կուսակցության մամուլի խոսնակ, վարչության անդամ Անժելա Խաչատրյանը եւ Երիտասարդական միության ներկայացուցիչ Նարեկ Այվազյանը:
Հանդիպման մասնակիցները խոսեցին ՀՀ ներքաղաքական, արտաքին քաղաքական մարտահրավերներից, Լեռնային Ղարաբաղի հիմնախնդրից, հայ-թուրքական հարաբերություններից եւ մի շարք այլ կարեւորագույն հարցերից:
Երկուստեք կարեւորվեց Հայաստանում տնտեսական ոլորտի զարգացման հեռանկարները եւ այդ գործընթացին նպաստող նախաձեռնությունների իրականացման անհրաժեշտությունը: Դեսպանը շեշտեց, որ իր եւ դեսպանատան առաջնահերթություններից է Հայաստանում ամերիկյան ներդրումների խթանումը եւ ՀՀ-ում ներդրումային դաշտի բարելավման ուղղությամբ իրականացվող աշխատանքներին աջակցությունը:
Հանդիպման մասնակիցները վստահություն հայտնեցին, որ հայ-ամերիկյան հարաբերությունների զարգացման ուղղությամբ ակտիվ աշխատանքներն ու նախաձեռնությունները պետք է շարունակական լինեն:
