ՄԱԿ գլխավոր քարտուղար Բան Կի Մունը Օսմանյան Թուրքիայում հայերի հալածանքները «վայրագ հանցագործություն» է համարում, սակայն չի շտապում դրանք ցեղասպանություն եզրով որակել՝ կոչ անելով երկրներին շարունակել համագործակցությունը 100 տարի առաջ կատարվածի փաստերը պարզելու համար։ Ապրիլի 13-ին նման դիրքորոշում է հայտնել ՄԱԿ գլխավոր քարտուղարի պաշտոնական ներկայացուցիչ Ստեֆան Դյուժարիկը։
Նրա խոսքով՝ համաշխարհային կազմակերպության քարտուղարությունը հաշվի կառնի Հռոմի Պապ Ֆրանցիսկոս Առաջինի հայտարարությունը, որը 1915-1916թթ. հայոց ջարդերը ապրիլի 12-ի պատարագի ժամանակ որակել էր 20-րդ դարի առաջին ցեղասպանություն։ Ինչպես նշել է Բան Կի Մունի ներկայացուցիչը, ՄԱԿ գլխավոր քարտուղարը հիանալի հիշում է, որ ապրիլի 24-ին Հայաստանում եւ աշխարհի այլ երկրներում նշում են 1915թ. ողբերգական դեպքերի տարելիցը եւ գիտակցում է կատարվածին որակավորումներ տալու հարցի նրբությունը, փոխանցում է ՏԱՍՍ-ը։
«Գլխավոր քարտուղարը վստահ է, որ այդ օրը նշելը, 1915թ. ողբերգական դեպքերի հիշատակը հարգելը եւ այդ դեպքերի փաստերը պարզելու շուրջ համագործակցելը պետք է ամրապնդի նման վայրագ հանցագործությունները ապագայում կանխելու մեր ընդհանուր ձգտումը»,- հայտարարել է Բան Կի Մունի պաշտոնական ներկայացուցիչը։
