Հայաստանում ԱՄՆ դեսպանատան հասարակայնության հետ կապերի գրասենյակի կողմից իրականացվող, ինչպես նաեւ Հայաստանի եւ Թուրքիայի, Հայաստանի եւ Ադրբեջանի հաշտեցմանն ուղղված ծրագրերը կրճատվել են։ Այս մասին ապրիլի 14-ին Երեւանում ԱՄՆ դեսպանատանը կայացած մամուլի ասուլիսի ժամանակ հայտարարել է երկրում ԱՄՆ արտակարգ եւ լիազոր դեսպան Ռիչարդ Միլսը։
Դեսպանը հավելել է, որ ծրագրերը կշարունակեն գործել իրենց հիմնական առաջնային նպատակների ուղղությամբ։ Եվ նույնը վերաբերում է USAID-ի ծրագրերին։ «ԱՄՆ միջազգային զարգացման գործակալությունը, որը Հայաստանում տնտեսական բարեփոխումների, կառավարման բարելավման, ժողովրդավարության կայացման ուղղված շատ կարեւոր ծրագրեր է իրականացնում, չի փակում իր դռները։ Եվ ԱՄՆ դեսպանատունը հավատարիմ է այդ առաջնային ուղղություններով իր հայ գործընկերների հետ համատեղ աշխատելու նպատակին,- վստահեցրել է Միլսը։
Ամերիկացի դիվանագետը նշել է, որ մի շարք նոր գլոբալ մարտահրավերներ են առաջացել, մասնավորապես էբոլայի համաճարակի, առողջապահության միջազգային ճգնաժամի, Ուկրաինային օգնելու անհրաժեշտության եւ «Իսլամական պետության» դեմ պայքարելու կապացությամբ։ «Եվ դրանց ազդեցության տակ ԱՄՆ ղեկավարությունը, ի դեմս նախագահ Բարաք Օբամայի, վերանայել է հատկացվող ֆինանսավորման չափերը։ Այդ քայլերի շրջանակներում վերանայվել է նաեւ Հայաստանին USAID-ի շրջանակներում հատկացվող օգնության չափը»,- ասել է Միլսը՝ հավելելով, որ իրենք միջոցների վերաբաշխման վերաբերյալ դժվարին որոշումներ են կայացրել։