Հռոմի պապը 2016-ին գալու է Հայաստան: Այս մասին այսօր՝ ապրիլի 14-ին,լրագրողների հետ զրույցում ասաց Մայր Աթոռ Սուրբ Էջմիածնի միջեկեղեցական հարաբերությունների բաժնի տնօրեն Հովակիմ եպիսկոպոս Մանուկյանը:
«Սխալ է այն տեղեկատվությունը, թե Հռոմի պապին հրավիրել են Հայաստան` ապրիլի 24-ին ներկա լինելու, դա այդպես չէ: Հայ Առաքելական եկեղեցին Հռոմի պապին հրավիրել է` նրան հարմար պահի գալ Հայաստան»,-ասաց Հովակիմ եպիսկոպոս Մանուկյանը:
Անդրադառնալով Թուրքիայի արձագանքներին Հռոմի Պապի ուղերձին` Հովակիմ եպիսկոպոս Մանուկյանը նշեց, որ Թուրքիան նախօրոք էր սկսել ճնշումներ գործադրել Վատիկանի վրա` հասկանալով Վատիկանի ազդեցությունը:
«Թուրքիան փորձեց վիժեցնել Հայոց ցեղասպանության թեմայով ցանկացած գործընթաց, սակայն Հռոմի պապը ոչ միայն օգտագործեց «ցեղասպանություն» եզրույթը, այլև կոչ արեց ամբողջ միջազգային հանրությանը` ճանաչել Հայոց ցեղասպանությունը»,-ասաց նա:
Նա նշեց, որ Հայոց ցեղասպանության 100-ամյա տարելիցի ոգեկոչման միջոցառումներին մասնակցելու համար Հայաստան են գալու եկեղեցական 38 պատվիրակություններ, 7 եկեղեցու պետեր, արքեպիսկոպոսներ, Սանկտ Պետերբուրգի միտրոպոլիտը, Լոնդոնի եպիսկոպոսը, որը Մեծ Բրիտանիայի արքայական ընտանիքի հոգևոր սպասավորն է և այդ ընտանիքի անունից խոսք է ուղղելու հայ ժողովրդին: