Ատլանտայի դատարանը 9 նախկին ուսուցիչների եւ դպրոցական վարչակազմի աշխատակիցների դատապարտել է տարբեր պատժաչափերով ազատազրկման՝ քննությունների արդյունքները բազմաթիվ անգամ կեղծելու համար:
Քննության տվյալներով՝ գործով անցնում են 44 դպրոցների 180 պաշտոնատար անձինք:
Դատավոր Ջերրի Բեքսթերը այդ հանցագործությունն անվանել է «քաղաքում տեղի ունեցած հանցագործություններից ամենազզվելին» եւ առավել խիստ պատիժ է սահմանել, քան առաջարկել էր մեղադրող կողմը:
Երեք մեղադրյալներ դատապարտվել են 20-ական տարվա ազատազրկման՝ 7 տարի անց պայմանական ազատ արձակման իրավունքով, հաղորդում է BBC-ի ռուսական ծառայությունը:
Եվս 4 անձ դատապարտվել է 5-ական տարվա պայմանական ազատազրկման, սակայն ճաղերի հետեւում կանցկացնեն 1-2 տարի:
Ամբաստանյալներից երկուսն ընդունել են իրենց մեղքը եւ հրապարակավ ներողություն խնդրել դատարանում: Նրանք համեմատաբար մեղմ պատժի են արժանացել: