Արգենտինայի նախագահ Քրիստինա Քիրշները հանդիպել է Արգենտինայի հայ համայնքի ներկայացուցիչների հետ, որպեսզի իր համերաշխությունը հայտնի Հայոց ցեղասպանության 100-րդ տարելիցի նախաշեմին:
Հանդիպմանը մասնակցել են Արգենտինայի արդարադատության նախարար Խուլիո Ալակը, Հայ եկեղեցու Արգենտինայի թեմի ներկայացուցիչ արքեպիսկոպոս Գիսակ Մուրադյանը, գործարար Էդուարդո Էռնեկյանը, արդարադատության նախկին նախարար Լեոն Արսլանյանը եւ Դանիել Ստամբուլյանը, հաղորդում է Prensa Armenia-ն:
Հիշեցնենք, որ Հայոց ցեղասպանության վերաբերյալ Հռոմի Պապի հայտարարությունից հետո, Թուրքիայի եվրոպական հարցերով նախարար Վոլքան Բոզքըրը ոչ միայն քննադատել էր Արգենտինան, այլեւ վիրավորել բոլոր արգենտինացիներին: Նա հայտարարել էր, որ ընդհանուր առմամբ արգենտինացիների ուղեղները լվացել են իրենց միջավայրում գտնվող հարուստ ու ազդեցիկ հայերը:
Բոզքըրը սկզբում լրագրողներին հիշեցրել էր, որ Ֆրանցիսկոսը կամ Խորխե Մարիո Բերգալյոն, ով ծնվել է 1936-ին Բուենոս Այրեսում, «արգենտինացի» է, այնուհետեւ ակնարկել էր, որ այդ երկիրն ունի իր մութ անցյալը: «Արգենտինան մի երկիր է, որը գրկաբաց ընդունել է Հոլոքոստի հայտնի հանցագործներին, նացիստ դահիճներին»,-ասել էր թուրք նախարարը:
Հռոմի Պապի հայտարարությունից խոցված թուրք նախարարը վիրավորել է ողջ Արգենտինան