ՀՀ նախագահ Սերժ Սարգսյանն այսօր՝ ապրիլի 16-ին, ընդունել է Հայաստանի Հանրապետությունում Արգենտինայի Հանրապետության արտակարգ եւ լիազոր դեսպան Դիեգո Ռիվերային, ով ավարտում է դիվանագիտական առաքելությունը մեր երկրում:
Նախագահի մամուլի գրասենյակից հայտնում են, որ նախագահը շնորհակալություն է հայտնել դեսպանին՝ պաշտոնավարման ժամկետում հայ-արգենտինյան հարաբերությունների զարգացմանն ուղղված նրա ներդրման համար՝ ընդգծելով, որ այդ հարաբերությունները հատկապես վերջին տարիներին որակական նոր մակարդակի բարձրացվեցին, ընդլայնվեց երկկողմ համագործակցության օրակարգը:
Նախագահը հաջողություններ է մաղթել Դիեգո Ռիվերային հետագա գործունեության մեջ եւ հույս հայտնել, որ հաջորդ դեսպանը նույնպիսի եռանդով եւ նվիրվածությամբ կկատարի իր առաքելությունը՝ ի նպաստ հայ-արգենտինյան բարեկամության:
Դեսպան Դիեգո Ռիվերան շնորհակալություն է հայտնել Նախագահին՝ գնահատանքի ու ջերմ խոսքերի համար, նշելով, որ Հայաստանում իր առաքելությունն իրականացնելու ընթացքում փորձել է առավելագույնս օգտակար լինել երկու բարեկամ երկրների եւ ժողովուրդների միջեւ հարաբերությունների ավելի սերտացմանն ու ամրապնդմանը եւ այսուհետ եւս Հայաստանից դուրս էլ շարունակելու է մնալ Հայաստանի ու հայ ժողովրդի բարեկամը:
Հանդիպմանը ՀՀ նախագահը եւ Արգենտինայի դեսպանը երկուստեք գոհունակությամբ են խոսել արգենտինահայ համայնքի մասին, նշելով, որ բավականին կազմակերպված եւ ուժեղ համայնքն զգալիորեն նպաստում է Հայաստանի եւ Արգենտինայի միջեւ միջպետական կապերի ամրապնդմանը: