Հայաստանը անցում է կատարել Եվրամիության հետ բանակցությունների նոր փուլ։ Այս մասին ապրիլի 17-ին ԱԺ-ում «Ռիգայում Արեւելյան գործընկերության գագաթնաժողովին ընդառաջ» թեմայով խորհրդարանական լսումների ժամանակ հայտարարեց ՀՀԿ պատգամավոր, ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը։
Նրա խոսքով՝ Արեւելյան գործընկերությունը ամենահեշտ օրերը չի ապրում։ Եվրոպական պետությունների զգույշ մոտեցումները գագաթնաժողովի հարցերին հասկանալի են։ Հայաստանն իր կողմից կարողացել է իր մոտեցումները առավելագույնը հասկանալի դարձնել իր եվրոպացի գործընկերների համար, իսկ բարձր մակարդակով անցկացվող բազմաթիվ հանդիպումների ժամանակ երկխոսության պատրաստակամություն է հայտնել։ «Մեկ անգամ չի նշվել, որ Եվրամիության հետ հարաբերություններում Հայաստանը հիմնվում է ընդհանուր արժեհամակարգի վրա, եւ այդ գործընթացը շարունակական է լինելու։ ԵՄ-ն պետական կառույցներում եւ պետական կառավարման ոլորտներում մեծ օգնություն է ցուցաբերել եւ շարունակում է աջակցել»,- ասաց Զաքարյանը։
Պատգամավորը պարզաբանեց, որ ներկայիս բանակցությունների գլխավոր նպատակը Հայաստանի ներկայիս պարտավորվածություններին չհակասող համագործակցության հնարավորություններ գտնելն է։ Այսուհանդերձ, ԵՏՄ-ին Հայաստանի անդամակցելը չի կարող խոչընդոտ հանդիսանալ ամենատարբեր ոլորտներում համագործակցելու համար։ Հիմա անհրաժեշտ է իրավական հարաբերությունների նոր համակարգ մշակել։ Մենք հույս ունենք, որ Ռիգայի գագաթնաժողվում կհնչեն հետագա համագործակցության պատրաստակամության ուղերձներ»,- եզրափակեց Արտակ Զաքարյանը։
Հիշեցնենք, որ գագաթնաժողովը կայանալու է մայիսի 21-22-ը Ռիգայում։