«Հիմնադիր խորհրդարանի» հինգ անդամների կալանավորումը ՌԴ նախագահ Վլադիմիր Պուտինի հրահանգով է եղել։ Այս մասին այսօր՝ ապրիլի 17-ին, Ազատության հրապարակում նրանց աջակցության հանարահավաքին ասաց կինոռեժիսոր Տիգրան Խզմալյանը՝ նշելով, որ Ցեղասպանության միջազգային ճանաչումը հնարավոր կլինի միայն այն ժամանակ, երբ Հայաստանն իսկապես անկախ պետություն դառնա։
Ազատամարտիկների դաշինքի վարչության անդամ Սմբատ Հակոբյանն ընթերցեց Ազատամարտիկների դաշինքի պահանջ-կոչը իշխանություններին, որում նշվում էր, որ «Հիմնադիր խորհրդարանի» անդամներն այսօր անազատության մեջ են իրենց քաղաքական հայացքների համար։
«Ազատամարտիկների դաշինքը անհամոզիչ է համարում պաշտոնական բոլոր փաստարկները, որոնց հիման վրա կալանավորվել ու անազատության մեջ են գտնվում մեր մարտական ընկերներն ու մյուս քաղբանտարկյալները։ Մենք համոզված ենք, որ նրանց կողմից ոչ մի գործողություն չէր տանի ցնցումների։ Մենք իշխանություններին կոչ ենք անում ընդունել մեր ընդունած կարգախոսը՝ «Հարյուրամյակն առանց քաղբանտարկյալների», եւ պահանջում շուտափույթ ազատ արձակել բոլոր քաղբանտարկյալներին»,- ասվում էր ազատամարտիկների հայտարարությունում։
Նշենք, որ հանրահավաքին հաջորդելու է նաեւ երթ։ Ավելի վաղ NEWS.am-ը հայտնել էր, որ «100-ամյակն առաց ռեժիմի» շարժումն ապրիլի 7-ին հայտարարել է, որ առավոտյան ժամը 06:35-ի սահմաններում «Հիմնադիր խորհրդարանի» շենք են ներկայացել իրավապահ մարմինների շուրջ երկու տասնյակ աշխատակիցներ եւ խուզարկություն իրականացրել: Խուզարկություններ են անցկացվել նաեւ ՀԽ անդամների տներում, որից հետո բերման են ենթարկվել Ժիրայր Սեֆիլյանը, Վարուժան Ավետիսյանը, Պավել Մանուկյանը, Հայկական վերածնունդի Լիբանանյան ներկայացուցիչ Թորոս Սեֆիլյանը (Ժիրայր Սեֆիլյանի եղբայր), Հովհաննես Ղազարյանը, Արամ Հակոբյանը, Գեւորգ Սաֆարյանը: Ավելի ուշ Ժիրայր Սեֆիլյանը, Վարուժան Ավետիսյանը, Գեւորգ Սաֆարյանը, Պավել Մանուկյանը եւ Գարեգին Չուգասզյանը ձերբակալվել են, ապա կալանավորվել: Նրանց նկատմամբ մեղադրանք է առաջադրվել Քրեական օրենսգրքի 225 հոդվածի 1-ին մասի հատկանիշով՝ զանգվածային անկարգություններ նախապատրաստելու հատկանիշով։ Իր հերթին հաղորդագրություն է տարածել ՀՀ Քննչական կոմիտեն, որում ասվում է, որ ՀՀ ազգային անվտանգության ծառայության եւ ՀՀ քննչական կոմիետի համատեղ ձեռնարկած միջոցառումների արդյունքում կանխվել է 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների կազմակերպումը: