Ապրիլի 17-ին ԱՊՀ երկրների ինստիտուտի, Ռուսաստանի Հանրային խորհրդի ու Ռուսաստանի հայերի միության նախաձեռնությամբ Մոսկվայի «President» հյուրանոցում տեղի ունեցավ «Հանցանքն առանց վաղեմության ժամկետի. Հայոց ցեղասպանության 100-րդ տարելիցին ընդառաջ» խորագրով գիտաժողով, որին մասնակցում էին ՌԴ-ում ՀՀ դեսպան Օլեգ Եսայանը, Ռուսաստանի հայերի միության նախագահ Արա Աբրահամյանը, ԱՊՀ երկրների ինստիտուտի տնօրեն, ՌԴ Հանրային խորհրդի անդամ Կոնստանտին Զատուլինը, մոսկովյան բուհերի եւ գիտահետազոտական կենտրոնների մասնագետներ եւ հայտնի քաղաքագետներ, դիվանագետներ, լրագրողներ:
Գիտաժողովի մասնակիցներին ուղղված ողջույնի խոսքով հանդես եկավ դեսպան Եսայանը, ով, անդրադառնալով Հայոց ցեղասպանության 100-րդ տարելիցին նվիրված միջոցառումները համակարգող հանձնաժողովի գործունեությանը, խոսեց իրականացված նախաձեռնությունների մասին: Դեսպանն իր խոսքում շեշտեց Հայոց ցեղասպանության 100-րդ տարելիցին նվիրված գիտաժողովի կազմակերպման կարեւորությունը` որպես Մեծ Եղեռնի վերաբերյալ գիտական զեկույցների եւ վերլուծությունների ներկայացման եւ ցեղասպանությունների կանխարգելման հարցում փորձագիտական քննարկումների ծավալման հարթակ: «Մենք շարունակելու ենք Հայոց ցեղասպանության միջազգային ճանաչմանն ուղղված այս գործընթացը, քանի որ դա վերաբերում է մեր ազգային անվտանգությանը: Ի վերջո, որպես ցեղասպանություն վերապրած ժողովուրդ` մենք կրում ենք պատասխանատվություն ոչ միայն մեր ժողովրդի եկող սերունդերի առջեւ: Համոզված եմ, որ հայ ժողովուրդը պետք է դառնա այս պայքարի առաջամարտիկը», - նշեց դեսպան Եսայանը:
Գիտաժողովին ելույթներով հանդես եկան Ռուսաստանի հայերի միության նախագահ Արա Աբրահամյանը, ԱՊՀ երկրների ինստիտուտի տնօրեն Կոնստանտին Զատուլինը, միջտարածաշրջանային «Հոլոքոստ» հիմնադրամի փոխնախագահ Իլյա Ալտմանն եւ այլոք: Գիտաժողովը շարունակվեց ռուսաստանյան հայտնի մասնագետների կողմից թեմատիկ զեկույցների ներկայացմամբ: