Սերբիայի խորհրդարանի իշխող կոալիցիայի պատգամավոր Ալեքսանդար Չոտրիչը սերբական «Երեկոյան լուրեր» պարբերականում Հայոց ցեղասպանության մասին հոդված է հրապարակել: Չոտրիչը նաեւ գլխավորում է Հայաստանի հետ Սերբիայի խորհրդարանի բարեկամության խմբի ղեկավարն է: Հոդվածում, մասնավորապես, նշված է.
«1915-23 թվականների հանցագործությունների ընթացքում շուրջ երկու միլիոն հայերի վտարեցին սեփական տներից: Հարյուր հազարավոր անմեղ մարդիկ՝ տղամարդ, կին եւ երեխա, սպանվեցին: Այսպիսով, հայերին ոչնչացրեցին մի հողից, որտեղ նրանք ապրում էին ավելի քան 2.5 հազար տարի:
Երեւանում «Ընդդեմ ցեղասպանություն հանցագործության» ֆորում է կայանալու: Ես հրավիրված եմ, որպեսզի Խորհրդարանի անունից ներկա լինեմ եւ հանդես գամ «Խորհրդարանականները՝ ընդդեմ ցեղասպանություն հանցագործության» թեմայով ելույթով:
Սերբ ժողովուրդը նույնպես ցեղասպանության զոհ է դարձել, որը 1941-45թ.թ. սանձազերծել են ուստաշների նացիստական իշխանությունները Խորվաթիայի Անկախ Պետության տարածքում: Հարյուր հազարավոր սերբեր սպանվեցին այն տարածքում, որը վերահսկում էր ուստաշների ռեժիմը (նացիստների խամաճիկային ռեժիմը - խմբ.):
Հայերի դեմ Օսմանյան կայսրության իրականացրած մեծագույն հանցագործությունն իրականացվեց սիրիական անապատով մահվան երթերի միջոցով, որի ընթացքում շատերը մահացան ծարավից եւ հյուծվելուց: Բացի այդ, նաեւ հայ ժողովրդի մշակութային ժառանգության ցեղասպանություն է իրականացվել: Հայկական աղբյուրների համաձայն, ոչնչացվել է 66 քաղաք, 25 հազար գյուղ, 2.350 քրիստոնեական եկեղեցի եւ շուրջ 1.500 դպրոց:
Հայերի ոչնչացման փաստերը քողարկելու հետեւանքով տասնամյակներ շարունակ ցեղասպանության մասին քիչ բան էր հայտնի: Դա էլ Ադոլֆ Հիտլերին թույլ տվեց 1939 թվականին՝ հրեաների եւ լեհերի կոտորածներից առաջ, հայտարարել. «Այսօր ո՞վ է հիշում հայերի կոտորածը»:
Կարծում եմ՝ հայերի դեմ սարսափելի հանցագործության 100-րդ տարելիցը նաեւ Հայաստանի եւ Թուրքիայի միջեւ դիվանագիտական հարաբերությունների կարգավորման, սահմանների բացման եւ հայ ու թուրք ժողովուրդների միջեւ նոր կամուրջ ստեղծելու հնարավորություն է»: