Իսպանալեզու «Marca de Gol» պարբերականը մանրամասն նկարագրում է արգենտինական Deportivo Armenio ֆուտբոլային թիմի մարզաշապիկի գունային գամման եւ խորհրդանիշը, որը հանդես է գալիս արգենտինական ֆուտբոլային չեմպիոնատի երրորդ լիգայում:
«Երբեմն մարզաշապիկը կարող է մարդկության պատմության ամենաողբեգական էջերի հիշատակի խորհրդանիշ դառնալ: Դա տեղի ունեցավ Deportivo Armenio ակումբի նոր համազգեստի պարագայում: Այդպես է պատկերացրել համազգեստը ակումբի տեխնիկական հովանավորը՝ մարզահագուստի Lyon ընկերությունը: Այդ մարզահագուստով թիմը խաղեր կանցկացնի՝ ի հիշատակ Հայոց ցեղասպանության 100-րդ տարելիցի:
Մարզաշապիկում գերակշռում է սուգ խորհրդանշող սեւ գույնը: Դրա վրա մոխրագույնի տարբեր երանգներով գծեր կան, որոնք սրտի հատվածում փոխվում են կարմիրի, կապույտի եւ ծիրանագույնի՝ հայոց դրոշի գույներով:
Շապիկի թեւքերին ապագան խորհրդանշող մանուշակագույն գծեր են, հավերժ արեւ եւ կյանքի հույս խորհրդանշող դեղին, անցյալի, սարսափի եւ հիշողության խորհրդանիշ սեւ եւ ներկան խորհրդանշող յասամանագույն: Իսկ մեջքին «Հիշում եմ եւ պահանջում» (հայերենով - խմբ.) մակագրությունն է:
