ԱՄՆ Կոնգրեսն ամեն տարի պաշտոնապես հավաքվում է հարգանքի տուրք մատուցելու Հայոց ցեղասպանության զոհերի հիշատակին։ Այդ մասին «Ամերիկայի ձայնի» հետ զրույցում ասել է ԱՄՆ Ներկայացուցիչների պալատի անդամ, Հայկական հարցերով հանձնախմբի համանախագահ Ֆրենկ Փալոնը։
«Այս տարի այն ապրիլի 22-ին է, միջոցառմանը մասնակցելու են եւ Ներկայացուցիչների պալատի անդամներ, եւ սենատորներ, նաեւ հասարակության ներկայացուցիչներ»,- նշել է Փալոնը։
Նրա խոսքով, Հայկական հարցերով հանձնախումբը մարտից նախաձեռնել է Հայոց ցեղասպանության բանաձեւի նախագիծը, որը շրջանառվում է Կոնգրեսում։ «Մենք փորձում ենք ստանալ հնարավորինս շատ սենատորների եւ Նեկայացուցիչների պալատի անդամների աջակցությունը։ Նախագիծը դեռ հանձնաժողովի շրջանակներում է քննարկվում, սակայն փորձում ենք նստաշրջանին ավելի առաջ մղել Ցեղասպանության ճանաչումը»,- նկատել է կոնգրեսականը։
Հարցին, թե ինչ հեռանկարներ է տեսնում հայ-թուրքական հարաբերությւոնների կարգավորման ուղղությամբ, Ֆրենկ Փալոնն ասել է. «Հայաստանը, իհարկե, կարող է իր ուղով գնալ Թուրքիայի հետ հաշտեցման, սակայն Ցեղասպանությունը իրականացվել է թուրքական կառավարության կողմից, եւ եթե այն չընդունվի, այդ հաշտեցումը կդառնա թյուր հույս, քանի որ հաշտեցումը միայն խոսքերով չի լինի։ Վառ օրինակը նախկինում ԱՄՆ-ի աջակցությամբ մեկնարկած գործընթացն էր, ուր երկու կողմերը ստորագրեցին արձանագրությունը։ Հայաստանը այն ներկայացրեց խորհրդարան, իսկ մյուս կողմը չցանկացավ հաշտեցմամբ պատասխանել։ Վերջին զարգացումների ներքո Թուրքիային չպետք է որ դժվարություն ներկայացնի Ցեղասպանության ճանաչումը Այն ճանաչեցին Հռոմի պապը, Իտալիան, ամերիկյան մի քանի նահանգներ, եւ այլն»։
Խոսելով Թուրքիայի վարչապետ Ահմեդ Դավութօղլուի ուղերձի մասին՝ ամերիկացի կոնգրեսականն ասել է. «Թուրքիայի վարչապետը կարող է ցավել ու ելույթ ունենալ։ Սակայն առանց ցեղասպանության ճանաչման այս ամենը չի բերի հաջողության եւ հաշտեցման, քանի որ բոլորը գիտեն, որ դա եղել է, ու պատմաբանների հանձնաժողովը չի կարող նպաստել կարգավորմանը»։
