Սիրիայի հանրությունը դատապարտում է Ցեղասպանությունը, որ Օսմանյան կայսրությունն իրականացրել է հայ ժողովրդի դեմ։ Այդ մասին հայտարարել է Սիրիայի Ժողովրդական Ժողովի նախագահ Ջիհադ Ալ-Լահրամը Երեւանում ընթացող «Ընդդեմ ցեղասպանության հանցագործության» երկօրյա գլոբալ ֆորումին։
«Միանում ենք ձեզ՝ բարձրացնելով մեր ձայնը ցեղասպանության, բռնի տեղահանման քաղաքականության դեմ։ Մենք ողջունում ենք մեր եղբայրներին Հայաստանում, Սիրիայում, կոչ ենք անում ճանաչել Ցեղասպանությունն ու հարգանք դրսեւորել։ Մարդու դեմ ցանկացած հանցագործություն պետք է դատապարտվի։ Այդ կոչը արդիական է Հայոց ցեղասպանության համար։ Մարդասպանները այսօր էլ շարունակում են սպանել։ Այն, ինչի ենթարկվում են Սիրիան եւ Իրաքը, ծրագրված ահաբեկչություն է։ Ձգտում են այդ տարածքները մաքրել բնակիչնեից, մարդկանց զրկել իրենց տներից՝ միաժամանակ ոչնչացնելով պատմության հուշարձանները։ 21-րդ դարում պատմությունը չի ներելու նրանց, ովքեր զավթում եւ ստրկացնում են»,- ասել է Ջիհադ Ալ-Լահրամը։