ԵԽԽՎ պատվիրակները գարնանային նստաշրջանի ընթացքում ստորագրություններ հավաքելով իրենց աջակցությունն են հայտնել հայկական պատվիրակությանն ու մի շարք եվրոպացի պատգամավորների՝ ստորագրելով Հայոց ցեղասպանության 100-րդ տարելիցին նվիրված գրավոր հայտարարության տակ: Այս մասին NEWS.am-ի թղթակցի հետ զրույցում նշել է ԵԽԽՎ-ում հայկական պատվիրակության ղեկավար, ՀՀ ԱԺ փոխխոսնակ Հերմինե Նաղդալյանը:
«Ստորագրությունների նման քանակություն, մոտ 200, մենք չէինք սպասում: Նույնիսկ այս նստաշրջանից բացակայող պատվիրակները իրենց էլեկտրոնային ստորագրություններն էին ուղարկել: Բացի այդ, Եվրոպայի Խորհրդում կազմակերպվել էր «Հայերը համաշխարհային մամուլի առաջին էջերում 100 տարի առաջ» խորագրով ցուցահանդեսը»,-ասել է Նաղդալյանը՝ հավելելով, որ ցուցահանդեսին ներկա են եղել ԵԽԽՎ նախագահ Անն Բրասերը, Բելգիայի ԱԳ նախարար, ԵԽ Նախարարների կոմիտեի նախագահ Դիդիե Ռեյնդերսը:
ԱԺ փոխխոսնակի խոսքով ԵԽԽՎ նստաշրջանի ընթացքում բոլոր հայ պատվիրակներն իրենց ելույթներում շոշափել են Հայոց ցեղասպանության թեման, իսկ մահմեդական աշխարհում ահաբեկչության թեմայի քննարկման ժամանակ ՀԱԿ խմբակցության ղեկավար Լեւոն Զուրաբյանը հանդես է եկել առաջարկով՝ մեկ րոպե լռությամբ հարգել բոլոր ցեղասպանությունների զոհերի հիշատակը՝ Հայոց ցեղասպանության, Հոլոքոստի, Դարֆուրի, Ռուանդայի: Եվ բոլոր ներկաները, բացառությամբ մի քանի թուրք պատվիրակների, ոտքի կանգնեցին:
«Ադրբեջանցիները եւ մի քանի թուրք պատվիրակներ հարգեցին ցեղասպանությունների զոհերի հիշատակը, ինչը շատ խորհրդանշական էր: Ավելի ուշ թուրքական պատվիրակությունում սկսել են ճնշել իրենց այն անդամներին, որոնք հարգել էին ցեղասպանությունների զոհերի հիշատակը»,-ամփոփել է Նաղդալյանը:
