ԱՄՆ նախագահը հանդես եկավ շատ հզոր ելույթով՝ խոսելով պատմական իրադարձություների մասին։ Այս մասին ապրիլի 24-ին կայացած ճեպազրույցի ժամանակ հայտարարել է Պետդեպի ներկայացուցիչ Մարի Հարֆը՝ պատասխանելով Հայոց ցեղասպանության մասին բազմաթիվ հարցերին։
Հարֆը կրկնել է արտահայտությունը, թե «մենք հասկանում ենք, որ որոշ մարդիկ ցանկանում են այլ բառեր լսել», սակայն նշել է, որ անհրաժեշտ է կարդալ նախագահի հայտարարությունը, որպեսզի հասկանալի լինի, թե որքան լուրջ է նա մոտենում այդ պատմական հարցին։
Այդ դիտարկմանը լրագրողը հիշեցրել է Օբամայի հայտարարության հետեւյալ արտահայտությունը. «Ես բազմիցս հայտարարել եմ, որ 1915թ. կատարվածի վերաբերյալ իմ կարծիքը եւ հայացքները չեն փոխվել» եւ հարցրել, թե ինչ հայացքների մասին է խոսքը։ Սակայն Հարֆը խուսափել է պատասխանից այնպես, ինչպես մյուս հարցերից. «կարծում եք, որ ԱՄՆ ազգային շահերի՞ց է բխում ժխտել Հայոց ցեղասպանությունը», «վախենու՞մ եք Թուրքիայից, ի՞նչ կարող է անել Թուրքիան այդպիսի հզոր պետության, ինչպիսին ԱՄՆ է»։
Բրիֆինգի ժամանակ լրագրողները ողջ շաբաթվա ընթացքում Մարի Հարֆին բազմաթիվ հարցեր են ուղղել Հայոց ցեղասպանության վերաբերյալ: Մասնավորապես խնդրել են մեկնաբանել Թուրքիայի նախագահ Ռեջեփ Թայիփ Էրդողանի հայտարարությունը եւ մեկնաբանել Հայոց ցեղասպանությունը Հոլոքոստի հետ:
ԱՄՆ պետքարտուղարության ներկայացուցիչը հրաժարվել է վերլուծել Էրդողանի հայտարարությունը, ու կրկին խնդրել է չհամեմատել երկու պատմական իրադարձությունները, որոնք տեղի են ունեցել հայերի ու հրեաների հետ:
