Հայաստանում տնտեսական վիճակով է պայմանավորված թե բանկերի կողմից վարկավորման, թե ավանդների ներգրավման նվազումը: Այս մասին NEWS.am-ի թղթակցի հետ զրույցում ասաց տնտեսագետ, Երեւանի նախկին քաղաքապետ, ՀԱԿ անդամ Վահագն Խաչատրյանին:
Նա շեշտեց, որ մարդիկ հնարավորություններ չունեն ոչ ավանդ ներդնել բանկերում, ոչ էլ վարկ վերցնել: Բանկերը եւս չեն կարող վարկեր տրամադրել, ֆինանսները բավարար չեն, ճգնաժամի մեջ գտնվող երկրի դեպքում սա շատ բնական է:
Ինչ վերաբերում է կանխատեսմանը, թե Ցեղասպանության 100-րդ տարելիցի օրերին դրամը կարող էր արժեւորվել, քանի որ բազմաթիվ հյուրեր էին ժամանել Հայաստան, տնտեսագետն ասաց, որ նման հիմք չկա, առաջիկայում էլ դրամը կարժեզրկվի, ինչը բերելու է գնաճի:
«Դրամը չի կարող արժեւորվել, այդպիսի հիմք չկա, դրա համար պետք է արտարժույթի ներհոսք լինի, պայմաններ են պետք, մինչդեռ մեր մոտ ոչ ներդրումները, ոչ արտահանումը, ոչ էլ տրանսֆերները չեն մեծացել, այսինքն՝ որեւէ նախապայման չկա, որ պատճառ դառնա դրամի արժեւորման համար»,-ասաց Վահագն Խաչատրյանը:
