Իրանի դեմ պատժամիջոցները պետք է հանվեն միջուկային ծրագրի շուրջ գործարքի ուժի մեջ մտնելու հետ միաժամանակ: Այս մասին հայտարարել է Իրանի ԱԳ նախարար Մուհամադ Ջավադ Զարիֆը Նյու Յորքում ԻՌՆԱ գործակալությանը տված հարցազրույցում: Զարիֆը ԱՄՆ է ժամանել մասնակցելու Միջուկային զենքի չտարածման մասին պայմանագրի շուրջ ամփոփիչ կոնֆերանսին:
«Մենք ամենասկզբից խոսել ենք, որ պատժամիջոցների չեղարկումը չպետք է մեր կողմից համաձայնությունների կատարման հետեւանք լինեն: Լոզանում (ապրիլի 2-ին) ձեռք բերված պայմանավորվածությունների համաձայն, պատժամիջոցները պետք է չեղյալ հայտարարվեն Իրանի միջուկային ծրագրի շուրջ ձեռքբերված պայմանավորվածությունների ուժի մեջ մտնելու հետ միաժամանակ»,-ասել է նա:
Նախարարի խոսքով, Իրանը նաեւ ամերիկյան կողմից պարզաբանումներ է ակնկալում ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի կողմից հավանության արժանացած «2015-ին Իրանի միջուկային ծրագրի շուրջ համաձայնագրի բովանդակությունը» անվանումը կրող օրինագծի շուրջ:
Իրանի ԱԳ նախարարի կարծիքով, այդ օրինագծում կա դրույթ, որն ԱՄՆ Կոնգրեսին իրավունք է տալիս հետագայում վերանայել Իրանի հետ հնարավոր միջուկային գործարքը: