Ուկրաինայի ՆԳ նախարար Արսեն Ավակովը հայտարարել է, որ Կիեւի կենտրոնում բողոքի ակցիա կազմակերպած ցուցարարաների միայն կեսն է իրականում հանքափոր։ Նրա կարծիքով՝ մյուս ցուցարարներին վարձել են ակցիա կազմակերպողները։
«Մարդկանց կեսն է միայն, որ իրոք եկել է ցույցի, մյուս կեսին վարձել են կազմակերպիչները։ Կա մի քանի հարուցված քրեական գործ, կան ձերբակալվածներ։ Դրանք հասարակական կարգը խախտած մարդիկ են։ Դրանք մարդիկ են, որոնք դիմադրություն են ցույց տվել ոստիկաններին»,- Ավակովի խոսքը մեջբերում է Ուկրաինայի ՆԳՆ մամուլի ծառայությունը։
Նշենք, որ անցյալ շաբաթ Կիեւի Գերագույն Ռադայի շենքի մոտ հանքափորների զանգվածային ակցիաներ են ընթացել։ Ուկրաինացի քաղաքական գործիչները ակցիայի կազմակերպման մեջ մեղադրում են օլիգարխ Ռինաթ Ահմեդովի «ԴՏԷԿ» ընկերությանը, իսկ ընկերությունում ադ լուրերը հերքել են։ Հանգստյան օրերին ցույցը ընդհատվել է, սակայն ցուցարարները խոստացել են այս շաբաթ վերականգնել բողոքը։