Նալբանդյան 116 հասցեում երեկ՝ ապրիլի 27-ին, բացվել է «Ալյանս» առաջադիմական ցենտրիստական կուսակցության կենտրոնական գրասենյակը: Այս մասին NEWS.am-ին հայտնեց կուսակցության մամուլի խոսնակ Վարդան Քոչարյանը:
Այն համակարգելու է «Ալյանսի» տարածքային և կառուցվածքային ստորաբաժանումների աշխատանքը: Հերթական նիստում նախաձեռնող խումբն հաստատել է գրասենյակի մշտական աշխատակազմը, ինչպես նաև մայիսի 16-ին կայանալիք հիմնադիր համագումարի կազմկոմիտեի կազմը:
Նշենք, որ ԱԺ պատգամավոր Տիգրան Ուրիխանյանը հայտարարություն է տարածել եւ նշել, որ ԲՀԿ-ում իր մնալն այլեւս աննպատակահարմար է: Նա ասել է, որ ընդունել է հազարից ավելի ազնիվ ու պարկեշտ իր համախոհների առաջարկն ու մասնակցում է «Քաղաքացիական շտաբի» հիմնադրմանը, որի շրջանակներում շարունակելու է պայքարը հանուն ապագայի: Նա դիմել էր մարզահամերգային համալիրին, որպեսզի մայիսի 2-ին դահլիճ տրամադրեն համագումարի համար, սակայն ազատ դահլիճ չկար: Դրանից հետո դիմել էին Կառավարության նիստերի դահլիճը վարձակալելու համար: «Քաղաքացիական շտաբի» նախաձեռնող խումբը որոշում է կայացրել հիմնադրելու «Ալյանս» Առաջադիմական Ցենտրիստական կուսակցությունը: