Նիգերիայի հյուսիս-արեւելքում գտնվող Դամասակ քաղաքում մի քանի հարյուր խաղաղ բնակչի մարմին է հայտնաբերվել: Ենթադրվում է, որ նրանք «Բոկո Հարամ» խմբավորման գրոհայինների հարձակման զոհ են դարձել:
«Մարմինները հայտնաբերվել են տներում, փողոցներում, ինչպես նաեւ ցամաքած Դամասակ գետի հատակին»,-AFP-ին պատմել է տեղի բնակիչ Կաումի Կուսուրը՝ հավելելով, որ բոլոր մարմինները ավելի ուշ թաղվել են 20 եղբայրական գերեզմաններում:
Բորնո նահանգի իշխանություններն իրենց հայտարարությունում զոհերի հստակ թիվ չեն նշել՝ սահմանափակվելու «հարյուրավոր» բառով: Հաղորդվում է, որ զոհերի թվում երեխաներ ու կանայք կան:
Նշենք, որ նախօրեին «Բոկո Հարամի» գրոհայինները երկրի Յոբե նահանգում 21 մարդու էին սպանել: Ավելի վաղ նշվել էր, որ իսլամիստական խմբավորումը փոխել է իր անունը եւ հիմա կոչվում է «Իսլամական պետության Արեւմտյան Աֆրիկայի նահանգ» (Islamic State"s West Africa Province — Iswap): «Բոկո Հարաբը» իր հավատարմությունն է հայտնել «Իսլամական պետություն» խմբավորմանը:
