Իսրայելում հայ համայնքի ղեկավարները հիասթափված են մնացել, որ նախագահ Ռեուվեն Ռիվլինը համառորեն խուսափել է ցեղասպանություն եզրն օգտագործել 100-ամյակին նվիրված պաշտոնական միջոցառումների ժամանակ, սակայն իրականում ավելի վաղ՝ այս ամիս, նա կատարվածը ցեղասպանություն եզրով էր որակել, գրում է The Times of Israel-ը։
Ապրիլի 13-ին օտարերկրյա լրագրողների հետ իր նստավայրում ունեցած հանդիպման ժամանակ Ռիվլինը հիշեցրել էր, որ նա եղել է առաջին իսրայելցի նախագահը, որը այդ մասին հունվարին խոսել էր ՄԱԿ-ում։
«Ասում են, որ նացիստները օգտագործել են Հայոց ցեղասպանությունը՝ որպես երեւույթ, որը նրանց թույլ է տվել կյանքի կոչել Հոլոքոստը։ «Այլեւս երբեք» բառերը պատկանում են մեզ բոլորիս, բոլոր ազգերին։ Մենք չենք կարող թույլ տալ, որ նման մի բան կատարվի»,- ասել էր նա։
Ռիվլինը Իսրայելում Հայոց ցեղասպանության ճանաչման կողմնակիցներից էր, սակայն անցյալ տարի նախագահ դառնալուց հետո նա այդ մասին զգույշ է արտահայտվում ու պաշտոնական ելույթներում չի օգտագործում ցեղասպանություն եզրը՝ ելնելով Իսրայելի վարած քաղաքականությունից։
Սակայն ապրիլի 13-ի ճեպազրույցում նա ողջունել էր Հռոմի Պապի ելույթը։ «Մենք չենք կարող թույլ տալ ռասիզմի, հակասեմականության եւ պատերազմի ժամանակ ցեղասպանություն որակվող գործողությունների դրսեւորում»,- ասել էր Ռիվլինը։
Նախագահի աշխատակազմից դեռեւս չեն արձագանքել The Times of Israel-ի խնդրանքին՝ մեկնաբանել փաստը։