ԲՀԿ նախագահ Նաիրա Զոհրաբյանի առաջարկով՝ Շենգավիթի տարածքային խորհրդում անց է կացվել կուսակցության նիստ եւ րոպեներ առաջ Երեւանի ավագանու ԲՀԿ խմբակցությունից դուրս եկած Սամվել Շառոյանին հեռացրել են կուսակցությունից: Այս մասին NEWS.am-ի թղթակցի հետ զրույցում ասաց ԲՀԿ մամուլի խոսնակ Վահան Բաբայանը:
Նա նշեց, որ ինչպես բոլորի դեպքում, այս դեպքում եւս Սամվել Շառոյանին մաղթում են հաջողություն իր նոր ծրագրերում ու գործերում: Իսկ թե ինչու է որոշում կայացվել նրան հեռացնել կուսակցությունից, մամուլի խոսնակը նշեց հետեւյալը. «Իսկ դուք ինչպե՞ս եք պատկերացնում, որ մարդը, եթե չի կիսում մեր քաղաքականությունը եւ դուրս է գալիս ֆռակցիայից, շարունակի մնալ կուսակցությունում: Մենք հույս ունենք, որ ինքը իր արժանավոր տեղը կգտնի այն կուսակցությունում, որի գաղափարներն ու տեսակետները կիսում է եւ որտեղից ինչ-որ խոստումներ է ստացել»,-ասաց Վահան Բաբայանը:
Հիշեցնենք, որ ապրիլի 30-ին տեղի է ունեցել Երեւանի ավագանու հերթական նիստը: Նախքան օրակարգի հարցերին անցնելը Երեւանի քաղաքապետ Տարոն Մարգարյանը տեղեկացրել է, որ Սամվել Շառոյանը Երեւանի ավագանու «Բարգավաճ Հայաստան» խմբակցությունից դուրս գալու դիմում է ներկայացրել: Քաղաքապետը նաեւ նշել է, որ նա, օրենքով սահմանված կարգով, կշարունակի մնալ Երեւանի ավագանու անդամ։
Ավելի վաղ NEWS.am-ը հայտնել էր, որ Ներքին Չարբախի նախկին գյուղապետ, այժմ Երեւանի ավագանու ԲՀԿ խմբակցության անդամ Սամվել Շառոյանի նկատմամբ Դատական ակտերի հարկադիր կատարման ծառայությունը 2013թ. հետախուզում է հայտարարել: Այս պատմությանը հանգամանալից անդրադարձել ենք, մանրամասներն այստեղ:
