Հայոց ցեղասպանության ճանաչումը բացարձակ կապ չունի այդ հարցով ներկայացվող պահանջների հետ։ Այս մասին մայիսի 1-ին կայացած մամուլի ասուլիս ժամանակ հայտարարել է «Մոդուս Վիվենդի» կենտրոնի ղեկավար Արա Պապյանը։
Նա հիշեցրել է, որ Ցեղասպանության 100-ամյակի կարգախոսն էր «Հիշում եմ եւ պահանջում»։ «Առաջին մասը՝ հիշելը, բավական հաջող անցավ. համաշխարհային լրատվական դաշտը լի էր այդ միջոցառումների մասին պատմող տեղեկություններով եւ հիմնականում տեղեկատվությունն անկողմնակալ էր»,- նշեց Պապյանը։ Նրա խոսքով՝ այստեղ մեծ դեր են խաղացել հայկական սփյուռքի ներկայացուցիչները՝ Քիմ Քարդաշյանը, Շառլ Ազնավուրը։
Ինչ վերաբերում է պահանջներին, Արա Պապյանը նշեց. «Անկեղծ ասած՝ ինձ համար անհասկանալի է, թե մենք ինչ ենք ուզում։ Շատերն ասում են, որ սկզբում պետք է ճանաչել Հայոց ցեղասպանությունը, իսկ հետո պահանջներ ներկայացնել. Ցեղասպանության ճանաչումը բարոյական հարթակում է։ Թուրքիայի կողմից Ցեղասպանության ճանաչումը ոչինչ չի փոխի։ Ճանաչման քաղաքականությունը, եթե այն տարվում է առանց մեր իրավունքների սահմանման, ոչ միայն անիմաստ է, այլ նաեւ վտանգավոր։ Մենք Թուրքիային մեր դեմ ենք լարում եւ դրա դիմաց ոչինչ չենք շահում։ Եթե մենք իրավական պահանջներ ենք դնում, ապա կան երկրներ, որոնք նույնպես շահագրգռված են դրանում, եւ այդպիսով մենք դաշնակիցներ ենք ձեռք բերում»։