ԼՂՀ Ազգային ժողովի ընտրությունները համապատասխանում են ազգային օրենսդրությանը, ճանաչված միջազգային սկզբունքներին, ազատ, թափանցիկ լեգիտիմ, ժողովրդավարական ընտրությունների անցկացման կազմակերպման նորմերին: Այս մասին, այսօր՝ մայիսի 4-ին, Ստեփանակերտում լրագրողների հետ հանդիպման ժամանակ նշել է Աբխազիայի Հանրապետության Ազգային ժողովի պատգամավոր, ԼՂՀ ընտրություններին աբխազական դիտորդական առաքելության անդամ Լեւոն Գալուստյանը:
«Մենք նշել ենք Ազգային ժողովի ընտրությունների բարձր կազմակերպվածությունը: Ընտրությունների օրը ընդհանուր առմամբ իրավիճակը հանգիստ է եղել, առանց միջադեպերի, չեն արձանագրվել զգալի խախտումներ ոչ ընտրողների գրանցման, ոչ քվեարկության կազմակերպման, ձայների հաշվարկման եւ արձանագրությունների ԿԸՀ տեղափոխման գործընթացներում»,-ասել է Գալուստյանը:
Նրա խոսքով, ընդհանուր առմամբ մայիսի 3-ին ԼՂՀ-ում կայացած խորհրդարանական ընտրությունները եղել են ազատ, թափանցիկ եւ արդար, դրանք համապատասխանել են ժողովրդավարական չափանիշներին եւ կարող են գնահատվել հերթական քայլը ԼՂՀ-ում ժողովրդավարության զարգացման ճանապարհին:
