Հայկական կողմն անհրաժեշտ է համարում ակտիվորեն համագործակցել ղարաբաղյան հակամարտության հետեւանքով անհետ կորածների մասին տվյալների փոխանակության հարցում: Այս մասին հայտարարեց Գերիների, պատանդների եւ անհետ կորածների հարցերի հանձնաժողովին առընկեր Աշխատանքային խմբի ղեկավար Արմեն Կապրիելյանը՝ NEWS.am-ի թղթակցի խնդրանքով մեկնաբանելով ԵԱՀԿ-ում ԱՄՆ դեսպան Դենիել Բեերի վերջին հայտարարությունը:
«Մենք միշտ խոսել ենք անհետ կորածների մասին տվյալների փոխանակման անհրաժեշտության մասին, եւ կրկին հայտարարում ենք այդ մարդասիրական խնդրի կարեւորության մասին»,- ընդգծեց Արմեն Կապրիելյանը՝ հիշեցնելով, որ Հայաստանն ակտիվորեն այդ հարցը բարձրացնում է դեռեւս 2008 թվականից:
Ավելի վաղ հաղորդվել էր, որ ԵԱՀԿ-ում ԱՄՆ դեսպան Դենիել Բեերը Վիեննայում Մշտական խորհրդի նիստի ժամանակ ղարաբաղյան հակամարտության կողմերին կոչ է արել հստակ միջոցներ ձեռնարկել տվյալների փոխանակման եւ Մինսկի խմբի համանախագահների այլ առաջարկությունների դիտարկման ուղղությամբ, որոնք նախատեսված են կողմերի միջեւ վստահության մթնոլորտի ստեղծման եւ շփումների ընդլայնման համար:
Միաժամանակ, ադրբեջանական կողմը չի ընդունում անհետ կորածների որոնման եւ նրանց մասին տվյալների փոխանակման ուղղությամբ համագործակցություն սկսելու՝ հայկական կողմի կոչերը:
