Հայաստանի խորհրդարանում մայիսի 5-ին սկսվել է արտասահմանում աշխատող քաղաքացիների հարկատվության մասին օրինագծի քննարկումը։ «Եկամտահարկի մասին օրենքում» համապատասխան փոփոխությունները ներկայացրել է Կառավարությունը։
Օրինագծի համաձայն՝ արտասահմանում պայմանագրով աշխատող Հայաստանի քաղաքացիների համար առաջարկվում է 13 տոկոս եկամտահարկ սահմանել (Հայաստանում ներկայում 24.4-36 տոկոս է)։ Ինչպես ասված է օրինագծերի փաթեթի գրավոր հիմնավորման մեջ, արդյունքում բյուջեն արտասահմանից լրացուցիչ եկամուտներ կստանա։ Բացի այդ, իջեցված հարկը չի խախտի երկրի ներսում աշխատաշուկայի մրցունակությունը, քանի որ չի տարածվի Հայաստանում աշխատանքային գործունեության վրա։
Ինչպես պարզաբանեց ՀՀ ֆինանսների փոխնախարար Վախթանգ Միրումյանը, արտասահմանում պայմանագրով աշխատող Հայաստանի քաղաքացիները այսպես թե այնպես, համապատասխան հարկ են մուծում ընդունող երկրում։ Տարբերությունը միայն այն է, որ հիմա այդ մուծումները կգնան Հայաստանի բյուջե։ Նա, սակայն, չպարզաբանեց, թե արտասահմանյան երկրները (Ռուսաստան, ԵՄ երկրներ, ԱՄՆ եւ այլն) ինչպես են համաձայնվելու կիսվել իրենց եկամուտներով։
