Թուրքիայում պետական հեղաշրջում կազմակերպելու մեղադրանքով «Մուրճ» գործով էլեկտրոնային տեսքով ներկայացրած փաստաթղթերի մի մասը դատարանը կեղծված է ճանաչել։ Նման որոշում է կայացրել հատուկ ծանր հանցագործությունների Անատոլիայի 4-րդ դատարանը։
Դատարանի հայտարարության մեջ նշվում է, որ 11-րդ ու 17-րդ սկավառակների վկայությունները, որոնք գործի վերանայման փուլում ներկայացրել էին լրագրողները, վերջնականապես կեղծված են ճանաչվել։ «Լուրջ կասկածներ կան, որ էլեկտրոնային տեսքով ներկայացված մյուս ապացույցները, որոնք հիմք են ծառայել դատավճիռ կայացնելու համար, նույնպես կեղծ են եղել»,- ասված է դատարանի որոշման մեջ։
Մեծ հնչեղություն ստացած «Մուրճ» դատական գործընթացը սկսվել էր 2012թ. սեպտեմբերին։ Գործով անցնում է 365 մարդ, որոնցից 250-ը ձերբակալված էին։ Դատավարության արդյունքում նրանցից 330-ին մեղավոր էին ճանաչել, գրում է ՏԱՍՍ-ը։
Իսկ 2014թ. հունիսին Սահմանադրական դատարանը որոշել էր, որ գործընթացի ընթացքում խախտվել են ֆիգուրանտների քաղաքացիական իրավունքները։ Քանի որ Սահմանադրական դատարանի վճիռը ենթակա է պարտադիր կատարման, գործը ուղարկվել էր վերանայման, որի արդյունքում այս տարվա մարտին մեղավոր ճանաչված բոլոր ֆիգուրանտները ազատ էին արձակվել։