Երեւանի Ավան թաղամասում կենտրոնական ջեռուցման նախագիծը բաժանորդների լուրջ պակաս ունի։ Այս մասին մայիսի 6-ին՝ Հանրային ծառայությունները կարգավորող հանձնաժողովի նիստին, հայտարարել է հանձնաժողովի նախագահ Ռոբերտ Նազարյանը՝ մեկնաբանելով «ԱրմՌոսԿոնԳեներացիա» ՓԲԸ-ի համար թողարկային էլեկտրաէներգիայի սակագնի նվազեցումը։ Նազարյանը նշել է, որ 2009թ. երբ ընկերությունը շահագործման հանձնեց կոգեներացիոն տեղակայանքը, ասվում էր, որ դրան կմիանա 3500 բաժանորդ այն ժամանակ, երբ այդ պահին նրանց քանակը չէր գերազանցում 440-ը։
«Մենք առանց դրա էլ ձեզ համար ապահովել ենք լավ սակագներ եւ պայմաններ շուկայում։ Սակայն դուք անհրաժեշտ ջանքեր չգործադրեցիք, որպեսզի նոր բաժանորդներ գրավեք»,- ասաց Նազարյանը։ Այսօրվա որոշմամբ ընկերությանը առավել պակաս շահավետ պայմաններ են առաջարկվել։ Նոյեմբերի 1-ից մարտի 31-ը ընկերության սակագինը հավասար կլինի Հրազդան ՀԷԿ-ի սակագներին, իսկ ապրիլի 1-ից հոկտեմբերի 31-ը՝ Երեւան ՀԷԿ-ի սակագներին։
Իր դիմումում ընկերությունը խնդրել էր մեկ կՎտ/ժ-ի դիմաց 59.693 դրամ։ Այսուհանդերձ Հանրային ծառայությունները կարգավորող հանձնաժողովի հաստատած սակագինը կկազմի 36.925 եւ 18.133 դրամ համապատասխանաբար տարվա սառը եւ տաք եղանակների համար։
