«Al Jazeera» հեռուստաալիքը հայկական հարցի շուրջ Անկարայի դիրքորոշման մասին զրուցել է Թուրքիայի հայկական «Ակոս» թերթի գլխավոր խմբագիր Էդվարդ Դանզիկյանի հետ:
Պատասխանելով հարցին, թե Թուրքիան ինչ կկորցնի կամ կշահի, եթե ճանաչի Հայոց ցեղասպանությունը, նա ասել է, որ Թուրքիան ոչինչ չի կորցնի: «Այն կդառնա մի երկիր, որն ընդունել է իր մութ անցյալը: Արդարություն եւ զարգացում կուսակցության տեսակետն այդ հարցում այսպիսին է. դա կարող էր տեղի ունենալ այլ երկրների պատմության մեջ, բայց ոչ երբեք մեր պատմության: Կառավարության կարծիքով, թուրքերի նախնիները երբեք ցեղասպանություն չէին կարող իրագործել, իսկ այլ երկրներն իրականացրել են: Այն, ինչ տեղի է ունեցել հայերի հետ, տեղավորվում է ցեղասպանության բնորոշման տրամաբանությունում: Այն, որ 1915 թվականը ցեղասպանություն չի բնորոշվում, չի նշանակում, որ ոչինչ տեղի չի ունեցել: Իրականում ոչ ոք թուրքերին կամ Թուրքիային չի մեղադրում, պետությունն ինքն է այդպիսի տեսակետ հայտնում: Ամեն դեպքում, այն ժամանակվա կառավարությունը՝ «Միասնություն եւ առաջընթաց» կուսակցության գլխավորությամբ, ծրագրել եւ իրականացրել է ցեղասպանությունը: Մենք դա ենք ասում: Դա այն ժամանակ ընթացող պատերազմի հետեւանք չէր, ինչպես կառավարությունն է պնդում: Դա ծրագրված էր»,- ասել է նա:
Դանզիկյանը հավելել է, որ այդ իրադարձությունների ճանաչումը Թուրքիային կփոխադրի մեկ այլ՝ աշխարհի երկրների բարձրագույն լիգա: «Թուրքիան պետք է դադարի այդ հարցը դիտարկել որպես պետությանը, կրոնին եւ ժողովրդին հասցված վիրավորանք»,- նշել է «Ակոս»-ի խմբագիրը՝ հավելելով, որ ժխտողական քաղաքականության խորը արմատավորումը երբեք չի փոխվել, նույնիսկ Արդարություն եւ զարգացում կուսակցության իշխանության տարիներին, որն իր գաղափարախոսությամբ շատ է տարբերվում մյուսներից եւ որը պայքարել է «Միասնություն եւ առաջընթաց» կուսակցության գաղափարախոսության ժառանգների դեմ:
Հարցին՝ ինչպե՞ս է Հայոց ցեղասպանության թեման ազդում Թուրքիայի հայերի վրա, նա պատասխանել է, որ հայերի մի մասն ընդհանրապես չի հետաքրքրվում այդ հարցով՝ մտածելով, որ որոշակի դրական քայլեր գոյություն ունեն եւ պետության հետ վիճելու պատճառ չկա: Իսկ հայերի մի մասը կարծում է, որ քանի դեռ ժխտողականությունը շարունակվում է, իրենք չեն կարող հանգիստ ապրել:
Ինչ վերաբերում է վերջին երկու տարիներին կառավարական մակարդակով ցավակցություններ հղելուն, Էդվարդ Դանզիկյանը կարծում է, որ դա դրական երեւույթ է: «Ամեն դեպքում, եթե ծանոթանաք ուղերձների բովանդակությանը, կտեսնեք, որ թուրքական կառավարությունը ցանկանում է, որպեսզի 1915 թվականի իրադարձությունները հիշեն այնպես, ինչպես այն իրենք են բնորոշում»,- նշել է պարբերականի գլխավոր խմբագիրը: