Բելառուսի նախագահ Ալեքսանդր Լուկաշենկոն չինացի ներդրողներին հրավիրում է օգտվել Եվրասիական տնտեսական միության տրամադրած առավելություններից։
«Բելառուսում արտադրություն դնելով՝ չինական բիզնեսը կարող է օգտվել ԵՏՄ շուկա դուրս գալու հնարավորությունից»,- հայտարարել է Լուկաշենկոն Մինսկում բելառուս-չինական բիզնես ֆորումի ժամանակ։
Լուկաշենկոն նշել է, որ Բելառուսը պատրաստ է հարթակ դառնալ չինական տնտեսությունը ԵՄ շուկա արտահանելու համար։ «Եթե բաց խոսենք, ՉԺՀ-ն առանց Բելառուսի էլ կարող է դուրս գալ ԵՏՄ շուկա, սակայն ԵՄ-ի հետ համագործակցելու համար նրան կօգնի Բելառուսը, իսկ նման համագործակցությունը շահավետ է Չինաստանի համար»,- ասել է բելառուս նախագահը։
ՉԺՀ առաջնորդ Սի Ձինպինն իր հերթին հայտարարել է, որ Բելառուսը՝ իբրեւ կարեւոր փոխադրամիջոցային հանգույց, յուրահատուկ աշխարհագրական դիրք ունի Մետաքսի ճանապարհի տնտեսական գոտի ստեղծելու համար եւ միաժամանակ գտնվում է Եվրոպայի կենտրոնում։
