Հայաստանում եկեղեցաշինության ասպարեզում առաջընթաց չկա, դրանք պարզապես տիպարային եկեղեցիների կրկնություններ են: Այս մասին, այսօր` մայիսի 11-ին, լրագրողների հետ հանդիպմանն ասաց Հայաստանի ճարտարապետների միության նախագահ Մկրտիչ Մինասյանը` հավելելով, որ Հայաստանի իշխանությունները պետք է այնպիսի քաղաքականություն վարեին, որ ներդնողները հին եկեղեցին վերանորոգեին, ոչ թե դրա կողքին նորը կառուցեին. «Ավանում կա չտեսնված միջնադարյան եկեղեցի, որը ոչ բարվոք վիճակում է, տեղանքն էլ՝ սոսկալի աղբի մեջ կորած, նույն պատկերն է Գառնիի մոտ, պետք է մտածել մեր այս արժեքները վերականգնելու, վերանորոգելու մասին, ոչ թե նորը կառուցելու»,-ասաց Մինասյանը:
Մկրտիչ Մինասյանը նաև նշեց, որ որևէ մեկին չի կարելի արգելել, որ իր գումարներով եկեղեցի կառուցի:
Երևանի կենտրոնում կառուցված Սուրբ Աննա եկեղեցու վայրը ճարտարապետը սխալ է համարում։
«Լավ կլիներ` Կաթողիկե եկեղեցին մնար իր անաղարտության մեջ: Ունեցանք մեծ եկեղեցի, որի կողքին Կաթողիկեի փոքրիկ բեկորը վերածվել է ավելորդության »,-ասաց նա:
Մկրտիչ Մինասյանը նաեւ դեմ է շատ մեծ եկեղեցիների կառուցման տենդենցին, որի վառ օրինակ է Կոմիտասի թանգարանի հարևանությամբ կառուցվող հսկայական եկեղեցին։
«Գիգանտամանիան, որ հիմա ունենք, մեզ բնորոշ չէ, դա պայմանավորված է գումար ներդնողների ցանկությամբ, ցավոք, մենք չենք կարողանում այնպիսի միջավայր ստեղծել, որ պատվիրողի ցանկությունը չիրականանա»,-ասաց Մինասյանը: