Օրերս Ռուսաստանի Դաշնության Նովոկուզնեցկ քաղաքում հայտնաբերվել ու ձերբակալվել է ծանրացուցիչ հանգամանքներում կատարված սպանության եւ ավազակային հարձակման մեղադրանքներով 20 տարի հետախուզման մեջ գտնվող Գեորգի Սաֆարյանը:

Դեպքը, որի համար նա հետախուզվում էր, տեղի է ունեցել 1995թ. հունվարի 26-ին: Ընկերներ Գեղամ Մախմուրյանը, Արթուր Թադեւոսյանը, Վահան Կուրղինյանը եւ Գեորգի Սաֆարյանը՝ տեղեկանալով, որ Հայկ Աբրահամյանն Իրանից վերադարձել է մեծ գումարով եւ նպատակ ունի Հայաստանում ասֆալտի գործարան կառուցել, նախապես հանցավոր համաձայնության գալով, գնում են նրա տուն, որտեղ էլ սկզբում թույնով քնեցնում, ապա մետաղալարով խեղդամահ են անում Հայկի Աբրահամյանին: Սակայն խոշոր գումարն այդպես էլ չգտնելով՝ հանցախումբը հափշտակում է թանկարժեք իրեր եւ փախուստի դիմում:

Հանցագործությունը բացահայտվում է օրեր անց: Հանցագործության մասնակիցներից երկուսը հայտնաբերվում եւ կալանավորվում են դեպքից օրեր անց, իսկ երրորդը հայտնաբերվում ու դատապարտվում է 1997թ.:

Գեորգի Սաֆարյանի հետախուզական գործը, ըստ բնակության վայրի, հանձնարարվում էր ոստիկանության Նոր Նորքի բաժնին, որին միայն 2014թ. հունվարին  է հաջողվել պարզել, որ Գեորգի Սաֆարյանն այլ՝ Արմեն Առաքելյան անվան տակ, բնակություն է հաստատել Ռուսաստանի Դաշնության Նովոկուզնեցկ քաղաքում:

Ըստ ոստիկանության՝ այժմ ձեռնարկվում են միջոցառումներ նրա էքստրադիցիայի հարցը լուծելու ուղղությամբ:

Մանրամասները՝ տեսանյութում