Արարատի նորանշանակ մարզպետ Էդիկ Բարսեղյանը մարզպետարանում կադրային ջարդ է սկսել: Նա աշխատանքից ազատում է մարզպետարանի այն աշխատակիցներին, որոնք նախկին մարզպետի՝ Վարդգես Հովակիմյանի «բերած» մարդիկ են եղել: Այս մասին NEWS.am-ին հայտնում են մարզպետարանի իր աղբյուրները:
Էդիկ Բարսեղյանը պաշտոնն ստանձնելուց հետո աշխատանքից ազատել է միանգամից մի քանի հոգու՝ մարզպետարանի հողաշինարար Վարդան Այվազյանին, մարզպետարանի քարտուղարության բաժնում առաջին կարգի մասնագետ Վարուժան Նիկալայանին, մարզպետի խորհրդական Սամվել Պողոսյանին, ֆինանսական վարչության պետ Ղեւոնդ Բարիկյանին: Նրանք բոլորը քաղծառայողներ են: Էդիկ Բարսեղյանն աշխատանքից ազատել է նաեւ Հովակիմյանի քարտուղարուհի Նանա Հովհաննիսյանին, ինչպես նաեւ մարզպետի վարորդ Ռաֆիկ Ալեքսանյանին:
Նշենք, որ Սամվել Պողոսյանը «Խոսրովի անտառ» պետական արգելոցի նախկին տնօրեն, անցյալ տարի նոյեմբերին սպանված՝ Սամվել Շաբոյանի ազգականն է, ով ընդամենը մեկ ամիս էր, ինչ քաղծառայության մրցույթում հաղթելուց հետո ընդունվել էր աշխատանքի: Մարզպետարանի մեր աղբյուրները հայտնում են նաեւ, որ Արարատի նոր մարզպետը աշխատանքից ազատվածների փոխարեն հիմնականում ընդունել է հին՝ Արարատի նախկին մարզպետ, ներկայիս ոստիկանապետ Ալիկ Սարգսյանի կադրերին: Ըստ մեր աղբյուրների՝ մարզպետարանում ստուգումներ ու վերահսկողություն է իրականացվում նաեւ այն աշխատակիցների նկատմամբ, ովքեր աշխատանքի բերումով մարզի ֆինանսական ու բյուջետային հարցերին են առնչվել: Ասում են՝ նոր մարզպետն ուզում է «կեղտ գտնել» նախկին մարզպետի վրա, ինչը սակայն, նրան առայժմ չի հաջողվել: