ՆախընտրելիԱրարատի մարզում երեկվանից ոչ պաշտոնապես «սուգ» է հայտարարված. մարզի մեծ մասը «սգում» է սիրելի, բայց արդեն նախկին մարզպետի՝ Վարդգես Հովակիմյանի հրաժարականը: Հովակիմյանի անժամանակ հրաժարականի մասին են խոսում մարզկենտրոն Արտաշատի շուկաներում, խանութներում, կանգառներում, երթուղային տաքսիներում եւ հնարավոր բոլոր տեղերում, որտեղ երկու հոգի մարդ կա: Հրաժարականի մասին լուրը միմյանց փոխանցելուց հետո զրուցակիների պատասխան արձագանքը լինում է հետեւյալը՝ «Վա՜յ, ափսոս, լավ մարդ էր, ինչի՞ են հանել գործից»: Ի դեպ, այդ հարցն այդպես էլ մնում է անարձագանք, լավագույն դեպքում ասում են՝ «եսի՞մ», քանի որ ո՛չ մարզի բնակիչները, եւ ո՛չ էլ ինքը՝ Հովակիմյանը չունեն այդ հարցի պատասխանը:
NEWS.am-ը քիչ առաջ զանգահարեց Արարատի մարզպետարան, (ուր եւս Հովակիմյանի հրաժարականի փաստը ծանր են տանում) իմանալու՝ արդյո՞ք նախկին մարզպետն այսօր այցելել է նախկին աշխատավայր՝ աշխատակիցներին հրաժեշտ տալու եւ իր անձնական իրերը տանելու համար: Մեր զանգին պատասխանեց Հովակիմյանի խորհրդականը, ով հայտնեց, թե իր նախկին շեֆը դեռեւս չի եկել մարզպետարան, իսկ թե հրաժեշտ տալու կգա, թե չի գա, դա արդեն իր՝ Հովակիմյանի գործն է: Ի դեպ, մարզպետարանում ոչ միանշանակ են ընկալում նոր մարզպետի՝ Էդիկ Բարսեղյանի նշանակման փաստը: Ասում են՝ «ղափանցին արտաշատցիների մեջ գլուխ չի հանի, չի դիմանա»՝ նկատի ունեալով, որ Բարսեղյանը ծնունդով կապանցի է: Իսկ այն հանգամանքը, որ նոր մարզպետը՝ Էդիկ Բարսեղյանը նախկին ավտոտեսուչ է եղել, է՛լ ավելի է ծանրացնում մարզպետարանի աշխատակիցների «վիշտը», քանի որ, նրանց խոսքով, «միլիցու հետ դժվար կլինի աշխատել»: Ի դեպ, Արարատի նախկին մարզպետ, իսկ այժմ ՀՀ ոստիկանապետ Ալիկ Սարգսյանը եւս մարզպետ էր նշանակվել՝գալով ոստիկանության համակարգից, ինչը, սակայն, նրա դեպքում այդքան ծանր տանելի հանգամանք չէր դիտարկվում:
Նշենք, որ այժմ Կառավարությունում տեղի է ունենում հերթական նիստը, որի օրակարգում է նաեւ Վարդգես Հովակիմյանի պաշտոնանկության հարցը: Մեզ հայտնի դարձավ, որ այժմ կառավարության շենքում է նաեւ Արարատի նոր մարզպետացուն: Ասում են, շատ է հուզված եւ ուրախությունից «տեղը չի գտնում»:
