Մայիսի 21-22-ը Ռիգայում «Արեւելյան գործընկերության» գագաթնաժողովի հիմնական թեման լինելու է ծրագրի անդամ երկրների (Հայաստան, Ադրբեջան, Վրաստան, Բելառուս, Մոլդովա եւ Ուկրաինա) հետ ԵՄ երկկողմ հարաբերությունները եւ ոչ թե Ուկրաինայում տիրող իրավիճակը։ Այս մասին մայիսի 19-ին հայտարարել է Լատվիայի վարչապետ Լայմդոտա Ստրաույուման։
«Մեզ մոտ են ժամանելու Արեւելյան գործընկերության» բոլոր 6 անդամները, եւ խոսքը վերաբերելու է տնտեսական համագործակցությանն ու երկկողմ հարաբերություններին։ Իհարկե Ուկրաինայի ճգնաժամը հնարավոր չի լինի շրջանցել, սակայն դա գագաթնաժողովի կենտրոնական մասը չի լինելու»,- ասել է նա Լատվիական ռադիոյին տված հարցազրույցի ժամանկ, փոխանցում է ՏԱՍՍ-ը։
«Ամեն երկրի համար կնախապատրաստվի հռչակագրի իր մասը, եւ կլինեն անհատական միջոցառումներ։ Օրինակ, Վրաստանն ու Ուկրաինան սպասում են վիզային ռեժիմի չեղարկմանը։ Կարծում եմ, մենք կհաստատենք ամսաթիվը, թե երբ դա հնարավոր կլինի։ ԵՄ-ն ուզում է ցույց տալ, որ բոլոր 6 երկրների հետ համագործակցությունը իր համար կարեւոր է»,- ասել է Ստրաույուման։