ՀՀԿ-ն դեռեւս ոչինչ չի կարող ասել Սյունիքի մարզպետ Սուրիկ Խաչատրյանի մեքենայի վրա կրակելու դեպքի վերաբերյալ: Այս մասին այսօր՝ մայիսի 20-ին, ՀՀԿ ԳՄ նիստից հետո լրագրողներին ասաց ԱԺ փոխնախագահ, ՀՀԿ ԳՄ անդամ Հերմինե Նաղդալյանը:
«Ճիշտ չէ ենթադրություններ անել մինչեւ նիստը: Մենք տեղյակ չենք եղել այդ դեպքի մասին, քիչ առաջ ենք տեղեկացել: Այս պահին ոչ մեկը չի կարող ասել, թե ինչ է իրականում տեղի ունեցել»,- ասաց նա:
Հերմինե Նաղդալյանը հավելեց, որ ՀՀԿ-ում, բնականաբար, մտահոգություններ կան այս միջադեպի կապակցությամբ:
Ավելի վաղ NEWS.am-ը տեղեկացրել էր, որ Կապան-Գորիս ճանապարհին կրակել են Սյունիքի մարզպետ Սուրիկ Խաչատրյանի մեքենայի ուղղությամբ: Սյունիքի մարզպետի խորհրդական Զարզանդ Նիկողոսյանը NEWS.am-ի հետ զրույցում հավելել էր, որ տուժողներ չկան, որեւէ մեկը չի վնասվել։