Ապրիլին Հայաստանի արդյունաբերությունը. վերջին ամիսների ընթացքում առաջին անգամ. արտադրանքի ֆիզիկական ծավալի երկնիշ աճ է արձանագրել, տարեկան կտրվածքով՝ 10.6%: Նկատենք, որ հաշվարկների բազան (անցյալ տարվա ապրիլը) ցածր չի եղել, անցյալ տարվա նույն ժամանակահատվածում՝ 2.8% աճի ցուցանիշով:
Հարկ է ենթադրել, որ «լոկոմոտիվը» կրկին մետաղական հանքարդյունաբերությունն է: Հայտնի է, որ այդ ոլորտն աշխատում է արտահանման համար՝ ապահովելով դրա զգալի մասը: Ներկայացնենք ընթացիկ տարվա առաջին եռամսյակի ավելի մանրամասն տվյալներ:
Այդ ժամանակահատվածում այդ ոլորտի արտադրանքի ծավալն աճել է 28%-ով, իսկ հանրապետության արդյունաբերական արտադրանքի ընդհանուր ծավալի տեսակարար կշիռը հասել է 19%-ի (անցյալ տարվա նույն ժամանակահատվածում՝ շուրջ 16%):
Սակայն մետաղական հանքարդյունաբերությամբ դրականը սահմանափակվում է. վերամշակվող արդյունաբերությունում բացասական շարժ է նկատվում: Հիմնականում դա կապված է խմիչքների, մասնավորապես՝ կոնյակի արտադրության ծավալների զգալի կրճատման հետ: Ռուսաստանում հայկական կոնյակի իրացման տեմպերի դանդաղումն արտադրողներին ստիպում է իրենց արտադրանքի իրացման արտաքին այլ շուկաներ փնտրել:
Ի դեպ, հունվար-ապրիլի նախնական տեղեկատվությունում արդեն արտահանման «շտկված» ցուցանիշ կա՝ տարեկան կտրվածքով 18.8% անկմամբ: Հիշեցնենք, որ ավելի վաղ, առաջին եռամսյակի արդյունքներով, անկումը 30.5% էր, ինչը վիճակագրական ծառայությունը բացատրում էր տեղեկատվության ոչ լիարժեք հավաքագրմամբ: Արտահանման մասով տեղեկատվությունը, կարծես, դեռեւս «լիարժեք չէ», այդ պատճառով հունվար-ապրիլին դրա տեմպի ցուցանիշի մասին տեղեկությունը բացակայում է:
Արդյունաբերության առաջատար ճյուղերից մեկը՝ բնական մենաշնորհների ոլորտը, լավագույն ժամանակները չի ապրում: Չնայած հաշվետու ամսում էլեկտրաէներգիայի արտադրությունը տարեկան կտրվածքով աճել է 8.0%-ով, հունվար-ապրիլի ընդհանուր արդյունքներով անկում է գրանցվել՝ նույնպես 8.0%-ով: Այդ ոլորտում, դատելով պաշտոնական տեղեկատվությունից, հսկայական պարտքեր են կուտակվել, ինչի համար ստիպված կլինենք վճարել սակագնի առաջիկա թանկացմամբ: