Պերմյակովի կատարած հանցագործության հանգամանքները նկարագրված չեն անգամ տեսության մեջ։ Այստեղից էլ բխում է դրա ծայրահեղ բարդ լինելը։ Այս մասին մայիսի 21-ին խորհրդարանում հայտարարեց ՀՀ գլխավոր դատախազ Գեւորգ Կոստանյանը՝ պատասխանելով «Ժառանգության» պատգամավոր Զարուհի Փոստանջյանի հարցին։
«Երեկ ես այդ հարցի մասին արդեն խոսել եմ։ Մնացածը Քննչական կոմիտեն է անում, որը, ինչպես տեսնում ենք, գործը բարեխղճորեն է կատարում։ Կարող եմ միայն ասել, որ դեպքը աննախադեպ է թե՛ հայ, թե՛ ռուս իրավապահների համար։ Սա դեպք է, որը նկարագրված չէ անգամ տեսության որեւէ դասագրքում։ Բայց հետաքննությունը տարվում է»,- նշեց Կոստանյանը։
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր: Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին: Փետրվարի 3-ին ՀՀ գլխավոր դատախազ Գեւորգ Կոստանյանը միջնորդությամբ դիմել էր ՌԴ գլխավոր դատախազ Յուրի Չայկային՝ Գյումրիում հունվարի 12-ին տեղի ունեցած դաժան սպանության դեպքով հարուցված քրեական գործի վարույթը ՀՀ իրավապահներին փոխանցելու հարցով, բայց մերժում էր ստացել:
