Մայիսի 21-ին «Նելեգալ-2015» օպերատիվ-կանխարգելիչ եւ «Կանալ-Պարեկ» լոկալ հակաթմրանյութային միջոցառումների շրջանակում ոստիկանության Արարատի բաժնի աշխատակիցները զինանոց են հայտնաբերել։
Ոստիկանները խուզարկել էին ոչ միայն տունն այլեւ, տանը կից օժանդակ եւ տնտեսական կառույցները: Բետոնե հորը, որտեղից իրավապահները դուրս են բերում զենք-զինամթերքը, տան հետնամասում է: Եթե ոչ մեկ վաշտի, ապա մեկ դասակի, ինչ խոսք, կբավականացնի: Տպավորիչ է ոչ միայն զենքերի քանակն այլեւ տեսականին:
Համապատասխան արձանագրություն կազմելուց եւ զենք-զինամթերքն առգրավելուց հետո ոստիկանները տանտիրոջ հետ բաժին են ուղեւորվում:
Խուզարկությամբ հայտնաբերվեց` «ԱԿ» տեսակի 5,45 մմ տրամաչափի 5 ինքնաձիգ, ձեռքի գնդացիր, դիպուկահար հրացան, 7,62 մմ տրամաչափի ծալովի խզակոթով ինքնաձիգ, «ՏՕԶ» տեսակի ատրճանակ, ձեռքի գնդացրի փող, 7,62 մմ տրամաչափի կարաբինի 294 փամփուշտ` իր շղթայով, 29 փամփշտատուփ եւ 1614 տարբեր տրամաչափի փամփուշտ: