Մայիսի 20-ից 21-ը Նիդերլանդների Հաագա քաղաքում կայացել է Միջազգային էներգետիկ խարտիայի նախարարական համաժողովը, որին մասնակցել է նաեւ Հայաստանի պատվիրակությունը` Էներգետիկայի եւ բնական պաշարների փոխնախարար Լեւոն Շահվերդյանի գլխավորությամբ: Համաժողովի նպատակն էր` հաստատել Միջազգային էներգետիկ խարտիան, որն ընդունել են 75 երկրներ եւ ստորագրել՝ 64-ը, այդ թվում՝ Հայաստանը:
Հավաքի ընթացքում Լեւոն Շահվերդյանը մասնակցել է «Էներգամատակարարումն էկոլոգիապես մաքուր դարձնելուն» նվիրված քննարկմանը՝ ներկայացնելով Հայաստանի փորձն այս ոլորտում, ձեռքբերումները, առկա մարտահրավերները եւ ապագա ծրագրերը: Նա նշել է, որ ներկայում այլընտրանքային էներգիան կազմում է Հայաստանի էներգարտադրության ավելի քան 9%-ը՝ հիմնականում բաղկացած լինելով ՀԷԿ-երից: Պետության կողմից առաջընթաց զարգացման նպատակով հատուկ ուշադրություն է դարձվում քամու, արեւի եւ երկրաբանական աղբյուրների էներգիայի զարգացմանը` նպատակ ունենալով առաջիկա տասնամյակում հասնել այլընտրանքային էներգարտադրության ավելի քան կրկնակի աճի:
Միջազգային էներգետիկ խարտիան նպատակ ունի զարկ տալ միջազգային համագործակցությանը եւ գործակցությանը` ուղղված էներգետիկայի զարգացմանը եւ այդ ոլորտում նորագույն տեխնոլոգիաների օգտագործմանը, խրախուսել երկրներին՝ նպաստել այլընտրանքային էներգետիկ աղբյուրների զարգացմանը եւ աստիճանաբար ներդնել էկոլոգիապես ապահով տեխնոլոգիաներ:
Համաժողովի շրջանակում Հայաստանի Էներգետիկայի եւ բնական պաշարների նախարարի տեղակալ Շահվերդյանը հանդիպել է Ուկրաինայի էներգետիկայի եւ ածխահանման հարցերով նախարար Դեմչիշինի հետ: Քննարկվել են էներգետիկայի զարգացման բնագավառում համագործակցությանն առնչվող հարցեր: